ৰাহুল-প্ৰিয়ংকাই নোৱাৰে, এতিয়াহে বুজিলে প্ৰশান্ত কিশোৰে

কংগ্ৰেছৰ উত্থানৰ বাবে প্ৰয়োজন হ’ব তৃতীয় এজন কংগ্ৰেছী। কিন্তু সেই তৃতীয়জন ব্যক্তি কোন? গান্ধী পৰিয়ালক কোনজন নেতাক নেতৃত্ব দিয়াৰ প্ৰস্তাৱ আগবঢ়ালে প্ৰশান্ত কিশোৰে? প্ৰশান্ত কিশোৰৰ বাছনিত উঠিল কোনজন কংগ্ৰেছী? স্বাভাৱিকতে ইয়াক লৈ চলিছে জল্পনা-কল্পনা। কিন্তু কৌশলী প্ৰশান্ত কিশোৰে এই সন্দৰ্ভত কোনো কথাই নক’লে। প্ৰশান্ত কিশোৰে নেতাজনৰ নাম ৰাজহুৱা কৰাৰ পৰা বিৰত থাকে।

স্বাভাৱিকতে এয়া প্ৰশান্ত কিশোৰৰ এক কৌশল। প্ৰশান্ত কিশোৰৰ এই প্ৰস্তাৱে গান্ধী পৰিয়ালক অসন্তুষ্ট কৰা যেন পৰিলক্ষিত হৈছে। কিন্তু এই সন্দৰ্ভতো স্পষ্টকৈ একো কোৱা নাই প্ৰশান্ত কিশোৰে। কিন্তু, ৰাহুল গান্ধীৰে প্ৰশান্ত কিশোৰৰ কথা যে মিলা নাই তাৰ ইংগিত পোৱা গৈছে প্ৰশান্ত কিশোৰৰ শেহতীয়া কেইবাটাও সাক্ষাৎকাৰত। কংগ্ৰেছত কিয় যোগদান নকৰিলে এই সন্দৰ্ভত প্ৰশ্ন কৰা প্ৰশান্ত কিশোৰে কয় যে কংগ্ৰেছক মোক নালাগে। তেওঁলোকে নিজৰ সিদ্ধান্ত নিজেই ল’ব পাৰে। কংগ্ৰেছত আছে বহু ডাঙৰ নেতা। অকল ইমানেই নহয় ৰাহুল গান্ধীৰ সন্দৰ্ভতো এক অতি তাৎপৰ্যপূৰ্ণ মন্তব্য কৰে প্ৰশান্ত কিশোৰে। মই কি  ইমান ডাঙৰ মানুহ, ৰাহুল গান্ধীয়ে যে মোক গুৰুত্ব দিব। এই মন্তব্যৰ অন্তৰালত লুকাই আছে ৰাহুল গান্ধীৰ প্ৰতি পি কেৰ অসন্তুষ্টি।

উল্লেখ্য যে কংগ্ৰেছৰ পুনৰ উত্থানৰ বাবে প্ৰশান্ত কিশোৰে প্ৰস্তুত কৰিছিল এলানি ব্লু-প্ৰিণ্ট। এই ব্লু-প্ৰিণ্ট লৈ গান্ধী পৰিয়াল আৰু এম্পাৱাৰ একচন কমিটীক দিছিল সুদীৰ্ঘ ৮ ঘণ্টীয়া প্ৰেজেণ্টেশ্যন। এই ব্লু-প্ৰিণ্টত আছিল কংগ্ৰেছৰ সংগঠনৰ আমূল সংস্কাৰৰ একচন প্লেন। কিছু কথা গান্ধী পৰিয়ালৰ সৈতে মিলিছিল আৰু কিছু কথা মিলা নাছিল। সবাতোকৈ ডাঙৰ কথাটো আছিল প্ৰশান্ত কিশোৰৰ এণ্ট্ৰিত ভেটো দিছিল মুস্তিমেয় জ্যেষ্ঠ কংগ্ৰেছীয়ে। ফলত প্ৰশান্ত কিশোৰে সকলো কথা বিবেচনা কৰি কংগ্ৰেছত যোগদান নকৰাটোৱেই সিদ্ধান্ত গ্ৰহণ কৰে।