ডিজিটেল ডেস্কঃ আই পি এলত মেচ ফিক্সিং সন্দৰ্ভত ৰয়েল চেলেঞ্জাৰছ বেংগালুৰুৰ বেগী বলাৰ মহম্মদ ছিৰাজৰ সৈতে যোগাযোগ কৰাৰ বিষয়টো চৰ্চালৈ আহিছে। কেৱল এয়াই নহয়, ছিৰাজক টকা দেখুৱাই প্ৰলোভিত কৰা হৈছিল প্ৰচুৰ পৰিমাণৰ ধন ল’বলৈ। অৱশ্যে এই বিষয়ত অভিযোগ পোৱাৰ কিছু সময়ৰ পাছতে বি চি চি আইৰ দুৰ্নীতি নিবাৰক শাখাই অভিযুক্তক গ্ৰেপ্তাৰ কৰিছে।
ভাৰতত আজিকালি ইণ্ডিয়ান প্ৰিমিয়াৰ লীগ ২০২৩ৰ উন্মাদনা তীব্ৰতৰ হৈ পৰিছে। ইয়াৰ সমান্তৰালকৈ আই পি এল বেটিং কৰি থকা বুকিসকলো দেশ-বিদেশতো সক্ৰিয় হৈ আছে। দেশৰ বিভিন্ন চহৰৰ পৰা বুকি ধৰা পৰাৰ খবৰ আহিছে। ইফালে আকৌ এবাৰ ওলাই আহিছে মেচ-ফিক্সিঙৰ প্ৰসংগ। এইবাৰ ফিক্সিঙৰ বাবে ৰয়েল চেলেঞ্জাৰছ বেংগালুৰুৰ বেগী বলাৰ মহম্মদ চিৰাজৰ কাষ চাপিছে এজন চালক৷
কিন্তু অভিযোগ পোৱাৰ লগে লগে বিচিচিআইৰ দুৰ্নীতি বিৰোধী শাখাই অভিযুক্তক গ্ৰেপ্তাৰ কৰে।
আচলতে আই পি এলত বাজি ধৰা এজন ড্ৰাইভাৰে আৰ চি বিৰ বেষ্ট বলাৰ মহম্মদ ছিৰাজৰ সৈতে যোগাযোগ কৰিছিল। সংবাদ মাধ্যমৰ খবৰ অনুসৰি চালকজনে ছিৰাজক প্ৰলোভিত কৰি কয় যে দলটোৰ ভিতৰৰ সবিশেষ প্ৰকাশ কৰিলে তেওঁক যথেষ্ট পৰিমাণৰ ধন দিব পাৰে। কিন্তু, ছিৰাজে এই তথ্য বি চি চি আইৰ দুৰ্নীতি নিবাৰক শাখাক প্ৰদান কৰে৷
বিষয়টো গুৰুত্বসহকাৰে লক্ষ্য কৰি বিচিচিআইৰ দুৰ্নীতি নিবাৰক শাখাই দ্ৰুত তদন্ত চলাই অভিযুক্ত চালকজনক গ্ৰেপ্তাৰ কৰে। বিচিচিআইৰ এজন বিষয়াই কয় যে ছিৰাজৰ সৈতে কোনো বুকিয়ে যোগাযোগ কৰা নাই, বৰঞ্চ এইজন হায়দৰাবাদৰ এজন চালকহে৷তেওঁ মেচত বাজি লগাই৷তেওঁ বাজিত বহু টকা হেৰাই গ’ল। সেইবাবেই চালকজনে ছিৰাজৰ লগত যোগাযোগ কৰে৷
Continue Reading
