ডিজিটেল ডেস্কঃ ৱাই প্লাছ সুৰক্ষা লাভ কৰিলে অল ইণ্ডিয়া ইমাম অৰ্গেনাইজেছনৰ মুৰব্বী ডঃ উমাৰ আহমেদ ইলিয়াছিয়ে৷ কিছু দিন পূৰ্বে আৰএছএছৰ মুৰব্বী মোহন ভাগৱতক ‘দেশপিতা’ আখ্যা দিয়াৰ পাছতে ইলিয়াছিক বিভিন্ন দেশৰ পৰা হত্যাৰ ভাবুকি প্ৰদান কৰা হৈছিল৷ হত্যাৰ ভাবুকি লাভ কৰাৰ পাছতে বিষয়টো লৈ ব্যস্ত হৈ পৰে ভাৰত চৰকাৰ৷ অৱশেষত তেওঁক ৱাই প্লাছ সুৰক্ষা প্ৰদান কৰা হয়৷
উল্লেখযোগ্য যে ২২ ছেপ্টেম্বৰ তাৰিখে মোহন ভাগৱতে ইলিয়াছিক লগ ধৰে৷ সাক্ষাতৰ অন্তত ইলিয়াছিয়ে ভাগৱতক দেশৰ পিতা হিচাপে আখ্যা দিয়ে৷
সংবাদ মাধ্যমৰ আগত ইলিয়াছিয়ে কয় যে ২৪ ছেপ্টেম্বৰৰ পৰা ২ অক্টোবৰলৈকে তেওঁ মুঠ তিনিটা ফোন কল ৰিচিভ কৰিছিল৷ বিভিন্ন দেশৰ পৰা অহা উক্ত ফোন কলসমূহত ইলিয়াছিক তেওঁৰ মন্তব্যৰ বাবে ক্ষমা খুজিবলৈ দাবী কৰা হৈছিল৷
তেওঁক ৱাই প্লাছ সুৰক্ষা প্ৰদান কৰাৰ পাছতে ভাৰত চৰকাৰক ধন্যবাদ জনায় ইলিয়াছিয়ে৷ তেওঁ জনায় যে তেওঁৰ ইতিমধ্যে ৱাই কেটেগৰীৰ সুৰক্ষা আছে৷ কিন্তু চৰকাৰে ইয়াক ৱাই প্লাছ কৰি তেওঁ আৰু তেওঁৰ পৰিয়ালক পৰম উপকাৰ সাধন কৰিলে৷
ক’ৰ ক’ৰ পৰা তেওঁলৈ ভাবুকি আহিছিল সেই বিষয়েও ইলিয়াছিয়ে সংবাদমাধ্যমৰ আগত মুখ খুলিছে৷ তেওঁ জনায় যে পশ্চিম বংগ, ইংলেণ্ড, ডুবাইৰ পৰা এইসমূহ ভাবুকি আহিছিল৷ আনকি তেওঁক হত্যাৰ ভাবুকিও প্ৰদান কৰিছিল৷ কিন্তু নিজৰ মতত অটল আছিল ইলিয়াছি৷
Continue Reading
