ডিজিটেল ডেস্কঃ ইছলাম ধৰ্মাৱলম্বী লোকসকলৰ বহুবিবাহ প্ৰথাৰ সম্পৰ্কত এক গুৰুত্বপূৰ্ণ পদক্ষেপ গ্ৰহণ কৰিছে এলাহাবাদ হাইকোৰ্টে৷ বাতৰি অনুযায়ী, এলাহাবাদ হাইকোৰ্টে এটা ৰায় প্ৰদান কৰি কৈছে যে যদি প্ৰথমা পত্নীৰ মতৰ বিপৰীতে গৈ এজন পুৰুষে দ্বিতীয় বিবাহত বহে, তেন্তে প্ৰথমা পত্নীক তেওঁৰ লগত থাকিবলৈ বাধ্য কৰিব নোৱাৰি৷ লগত ৰাখিবলৈ চিভিল কোৰ্টলৈ যাব নোৱাৰিব৷
আদালতলৈ প্ৰেৰণ কৰা এখনি আবেদনৰ ভিত্তিত ন্যায়াধীশ সূৰ্য প্ৰকাশ কেছৰৱানি আৰু ৰাজেন্দ্ৰ কুমাৰেৰে গঠিত এখনি বিচাৰপিঠে এই ৰায় প্ৰদান কৰিছে৷ বিচাপৰীঠখনে কয় যে প্ৰথমা পত্নীৰ মতৰ বিপৰীতে দ্বিতীয়বাৰৰ বাবে বিবাহপাশত বহাটো প্ৰথমা পত্নীৰ প্ৰতি কৰা নিষ্ঠুৰতা৷
বিচাৰপীঠখনে এইক্ষেত্ৰত ইছলাম ধৰ্মৰ পৱিত্ৰ কোৰাণৰ উদ্ধৃতি দাঙি ধৰে৷ কোৰাণৰ ৪ সংখ্যক চুড়া ৩ সংখ্যক আয়াত অনুযায়ী বহুবিবাহ সম্পৰ্কে এটা গুৰুত্বপূৰ্ণ সিদ্ধান্ত আছে৷ সিদ্ধান্ত অনুযায়ী এজন মুছলিম লোকে চাৰিবাৰলৈ বিবাহপাশত আৱদ্ধ হ’ব পাৰে৷ কিন্তু ইয়াৰ বাবে পত্নীকেইগৰাকীৰ মত আৰু ইচ্ছা লাগিব৷ যদি মত নিমিলে, তেন্তে লোকজন এগৰাকীতে ক্ষান্ত থাকিব লাগিব, অধিক বিবাহ কৰাব নোৱাৰিব৷ বিচাৰপীঠখনে কোৰাণৰ এই সিদ্ধান্ত অনুযায়ীয়ে ৰায়প্ৰদান কৰিছে৷
আদালতে কয় যে যদি লোকজনে নিজৰ পত্নী আৰু সন্তানৰ ভৰণ পোষণ লোৱাত অক্ষম, তেন্তে কোৰাণৰ সিদ্ধান্ত অনুযায়ী তেওঁ আন এগৰাকী মহিলাক বিয়া কৰাব নোৱাৰিব৷ অন্যথা দ্বিতীয় বিবাহ বেআইনী হিচাপে গণ্য কৰা হ’ব৷
Continue Reading
