ডিজিটেল ডেস্কঃ সঁচাকৈয়ে সঞ্জীৱ গোৱেংকাই লোকেশ ৰাহুলক ভৎসনা কৰিছিল নেকি? অন্ততঃ বাহিৰৰ পৰা তেনেকুৱা যেনেই লাগিছিল। গোৱেংকাক যথেষ্ট উত্তেজিত যেন লাগিছিল। সন্মুখত থিয় হৈ ৰাহুল নিমাত হৈ আছিল। দলৰ মালিকে দলৰ অধিনায়কক কি কৈছিল? লক্ষ্ণৌ ছুপাৰ জায়েন্টছৰ প্ৰশিক্ষক জাষ্টিন লেংগাৰে এই ঘটনাৰ ছয় দিনৰ পাছত উদঙাই দিয়ে।
এটা সাক্ষাৎকাৰত লেংগাৰে কয় যে যিটো হ’ল ক্ৰিকেটৰ প্ৰতি থকা আকৰ্ষণৰ বাবে। আই পি এলত দলৰ মালিকৰ উৎসাহ দেখি তেওঁ স্তম্ভিত হৈ পৰিছে। লেংগাৰে কয়- ''এই কাণ্ডক লৈ এক বৃহৎ হুলস্থুলৰ সৃষ্টি হৈছে। ভাৰতত ক্ৰিকেটৰ প্ৰতি থকা আকৰ্ষণে মোক আচৰিত কৰি তোলে। সকলোৰে এই আৱেগ আছে। গোৱেংকাৰো আছে, মোৰো আছে। ৰাহুলৰো আছে।”
হায়দৰাবাদৰ হাতত ১০ উইকেটত পৰাস্ত হোৱাৰ পাছত দলৰ সকলোৱে হতাশ হোৱা বুলি কয় প্ৰশিক্ষকগৰাকীয়ে। তেওঁলোকে যি পৰিকল্পনা কৰিলে সেয়া কামত নাহিল। গতিকে তেওঁ অধিনায়কৰ পৰা পৰৱৰ্তী মেচৰ পৰিকল্পনা জানিব বিচাৰিছিল।
লেংগাৰে কয়- ''সেই মেচখনত আমাৰ পৰিকল্পনাই কাম কৰা নাছিল। খেলৰ অন্তত গোৱেংকাই খেলপথাৰলৈ আহি ৰাহুলক সুধিলে, ‘কি হৈছে? আমাৰ পৰিকল্পনাই কামত নাহিল। গতিকে পৰৱৰ্তী মেচৰ পৰিকল্পনাত আমি কি সলনি কৰিব লাগিব?’”
সমগ্ৰ ঘটনাৰ ভিডিঅ' মুকলি কৰা হ'ল যদিও কোনো কথা নাই। ফলত তেওঁলোকে কি কথা পাতিছে কোনেও জানিব পৰা নাছিল। লেংগাৰৰ মতে এইটোৱেই মূল সমস্যা। তেওঁ কয়, ‘আমি ইয়াৰ সমাধান বিচাৰিবলৈ চেষ্টা কৰি আছিলো। কিন্তু সমগ্ৰ আলোচনাৰ এটা শব্দও কোনেও শুনা নাছিল। গোৱেংকাক উত্তেজিত হোৱা দেখি সকলোৱে ভাবিলে যে তেওঁ বেয়াকৈ কথা কৈছে। কিন্তু নহ’ল। আমি ভালকৈ কথা পাতি আছিলো। ক্ৰিকেটৰ বিষয়ে আলোচনা চলি আছিল।”
Continue Reading
