ডিজিটেল ডেস্কঃ এডাল নেজ লৈ জন্ম হ’ল এগৰাকী কন্যাশিশু। এই বিৰল ঘটনাটো সংঘটিত হৈছে মেক্সিকোত। 'জাৰ্ণাল অৱ পেডিয়াট্ৰিক চাৰ্জাৰী’ত প্ৰকাশিত এটা গৱেষণাপত্ৰত প্ৰকাশিত হৈছে ঘটনাটোৰ বিষয়ে।
জানিব পৰামতে, উত্তৰ মেক্সিকোৰ এখন গাঁৱৰ হস্পিতালত অস্ত্ৰোপচাৰৰ মাধ্যমেৰে জন্ম হয় এটি কন্যাশিশুৰ। চিকিৎসকসকলে দেখে যে শিশুটিৰ নিতম্বৰ ঠিক ওপৰত একোছা নোম আৰু তাতে দুই ইঞ্চিৰ এডাল নেজ আছে।
বিষয়টো সন্দৰ্ভত জানিবলৈ এক্সৰে’ কৰে চিকিৎসকসকলে। নিশ্চিত হয় যে নেজডালৰ ভিতৰভাগত কোনো হাড় নাই। সাধাৰণতে কিছু ক্ষেত্ৰত কঁকালৰ তলৰ হাড় বাঢ়ি গৈ এইধৰণৰ অবয়ৱ লয়। ইয়াক ভেচটিয়েল নেজ বোলা হয়।
কিন্তু কন্যাশিশুটিৰ নেজডাল তেনে ধৰণৰ নহয়। সম্পূৰ্ণ নিখুঁট আৰু স্বাভাৱিক নেজডালক লৈ ব্যস্ত হৈ পৰে চিকিৎসকসকল। আনকি নেজডালত স্নায়ু সংবেদনশীলতাও আছে।
চিকিৎসকসকলে জনায় যে নেজডালৰ বাদে কন্যাশিশুটিৰ দেহত কোনো অস্বাভাৱিকতা নাই। জন্মৰ দুমাহৰ অন্তত কন্যাশিশুটিৰ নেজডাল অস্ত্ৰোপচাৰৰ দ্বাৰা কাটি পেলোৱা হয়।
বিষয়টোৱে সম্প্ৰতি যথেষ্ট কৌতূহলৰ সৃষ্টি কৰিছে। এই পৰ্যন্ত আধুনিক ইতিহাসত মাত্ৰ ৪০টা এনেধৰণৰ ঘটনা সংঘটিত হৈছে।
Continue Reading
