ডিজিটেল ডেস্কঃ অষ্ট্ৰেলিয়াৰ চিডনীৰ বণ্ডি বীচত আজি পুৱাই হাজাৰ হাজাৰ লোকে সম্পূৰ্ণ নগ্ন হৈ ফটো শ্বুটত ভাগ লয়৷ এক মহান উদ্দেশ্যলৈ প্ৰায় ২,৫০০ পুৰুষ-মহিলাই সম্পূৰ্ণ নগ্ন হৈ একেলগে থিয় দিয়ে৷ বিশ্বত কোনো সাগৰতীৰত এনেদৰে একেলগে হাজাৰ হাজাৰ লোকে নগ্ন হৈ ফটো শ্বুট কৰাৰ এয়াই প্ৰথম ঘটনা ৷ আমেৰিকাৰ প্ৰসিদ্ধ ফটোগ্ৰাফাৰ স্পেন্সাৰ টুনিকৰ ফটো শ্বুটৰ বাবেই এনেদৰে প্ৰায় ২,৫০০ ডেকা-গাভৰুৱে নগ্ন হৈ সাগৰতীৰত সমবেত হ’ল৷
শনিবাৰে পুৱা পোহৰ হোৱাৰ লগে লগেই নগ্ন লোকেৰে ভৰি পৰে সাগৰৰ পাৰ৷ কিন্তু কিয় একে সময়তে এনেদৰে হাজাৰ হাজাৰ লোক নগ্ন হ’ল? দৰাচলতে ছালৰ কৰ্কট ৰোগৰ বিষয়ে সজাগতা সৃষ্টিৰ বাবেই এনেদৰে হাজাৰ হাজাৰ লোকে নগ্ন ফটোশ্বুট কৰিলে৷। চিডনীৰ বণ্ডি বীচত ৰাজহুৱা নগ্নতাৰ অনুমতি দিবলৈ আইন সলনি কৰিব লগা হৈছিল ।
প্ৰতি বছৰে ছালৰ কৰ্কট ৰোগত আক্ৰান্ত হৈ বহু লোকৰ মৃত্যু হৈ আহিছে৷ ছালৰ কৰ্কট ৰোগৰ বিষয়ে মানুহ বিশেষ সজাগ নোহোৱাৰ বাবেই ছালত আৰম্ভ হোৱা কৰ্কট ৰোগে সময়ত বহু দূৰলৈ শিপাই গৈ৷ সেয়ে মানুহক সচেতন কৰাৰ বাবে শিল্পী স্পেন্সাৰ টুনিকে এনে অভিনৱ পদক্ষেপ গ্ৰহণ কৰে৷ তেওঁ সকলোকে নিয়মীয়াকৈ ছাল পৰীক্ষা কৰোৱাবলৈ আহ্বান জনায়৷ ছালত সামান্য বিসংগতি দেখিলেই চিকিৎসকৰ পৰামৰ্শ ল’বলৈও শিল্পীগৰাকীয়ে কয়৷
তেওঁ কয় " ছালে আমাক একত্ৰিত কৰে আৰু আমাক সুৰক্ষা দিয়ে," । পুৱা ৫.৩০ বজাত সাগৰৰ পাৰ পোহৰেৰে ভৰি পৰিছিল আৰু টুনিকৰ আহ্বানত সকলোৱে নগ্ন হৈ ফটো শ্বুটত ভাগ লৈছিল৷ ফটোগ্ৰাফিক শিল্পী স্পেন্সাৰ টুনিকৰ এনে প্ৰচেষ্টাক বহুতে আদৰণি জনাইছে যদিও বহুতে ইয়াক সমালোচনাও কৰিছে৷
বহুতে কৈছে যে ছালৰ কৰ্কট ৰোগৰ বিষয়ে সজাগতা সৃষ্টি কৰাৰ বাবে আন পন্থাও গ্ৰহণ কৰিব পৰা গ’লহেঁতেন৷ ২০১০ চনতো টুনিকে চিডনীৰ অপেৰা হাউচত একে ধৰণৰ এটা ফটো শ্বুট কাৰ্যসূচী হাতত লৈছিল৷
Continue Reading
