ডিজিটেল ডেস্কঃ এগৰাকী ভাৰতীয় মহিলাই এটা নহয়, দুটা নহয়, তিনিটা নহয় একেলগে জন্ম দিলে ৫টাকৈ সন্তান। এই ঘটনাই চিকিৎসকৰ চকুও কপালত তুলিছে। ঝাৰখণ্ডৰ ৰিমছ ৰাঁচীৰ মহিলা আৰু প্ৰসৱ বিভাগত ইটখোৰি চত্ৰৰ এগৰাকী মহিলাই জন্ম দিলে পাঁচটা সন্তান। কেঁচুৱাকেইটা এন আই চি ইউত চিকিৎসকৰ তত্বাৱধানত আছে।
ড° শশী বালা সিঙৰ নেতৃত্বত মহিলাগৰাকীৰ সফল প্ৰসৱ কৰোৱা হয়। পাঁচটা সন্তান একেলগে জন্ম হোৱা খবৰত সকলো আচৰিত হৈছে। পাঁচোটা শিশু সুস্থ আৰু নিৰীক্ষণৰ বাবে নৱজাতকৰ নিবিড় যত্ন ইউনিট (এন আই চি ইউ)ত ৰখা হৈছে। ৰিমছ ৰাঁচীয়ে নিজৰ টুইটাৰ হেণ্ডেলৰ জৰিয়তে এই তথ্য দিছে।
চিকিৎসকে জনোৱা মতে, আটাইকেইটা শিশু প্ৰি-মেচিউৰ। মাত্ৰ ২৬-২৭ সপ্তাহতে জন্ম হৈছে সিহঁতৰ। এনে পৰিস্থিতিত শিশুকেইটিৰ অৱস্থাৰ ওপৰত অহৰহ নিৰীক্ষণ কৰি থকা হৈছে। শিশুকেইটিৰ সঠিক যত্ন লোৱা হৈছে। ইয়াৰ পূৰ্বে আন এগৰাকী মহিলাই ৰিমছত চাৰিটা সন্তান জন্ম দিছিল। তেওঁৰ সকলো সন্তান সুস্থ হৈ উঠিছিল। আশা কৰা হৈছে যে এই ৫টা শিশুও সোনকালে সুস্থ হৈ উঠিব।
উল্লেখ্য যে একেলগে বহুকেইটা সন্তান জন্ম দিয়াৰ ঘটনা এয়াই প্ৰথম নহয়। বিশ্বৰ ভিন্ন প্ৰান্তৰ পৰা এনে খবৰ আহি থাকে। ২০১৪ চনত মণিপুৰৰ এগৰাকী মহিলাইও ৫টা সন্তান জন্ম দিছিল। কিন্তু সেই সময়ত ৫ সন্তানৰ মাজত এগৰাকী কন্যাৰ মৃত্যু হয়। ২০২৩ চনত বাংলাদেশৰ জামালপুৰত এগৰাকী মহিলাই একেলগে ৪ গৰাকী কন্যা সন্তান জন্ম দিছে।
সেইদৰে, ২০১৯ চনত উত্তৰ প্ৰদেশৰ গোণ্ডা অঞ্চলত এগৰাকী মহিলাই একেলগে ৪টা সন্তান জন্ম দিছিল। যোৱা বছৰ ওড়িশাৰ এগৰাকী মহিলাইও একেলগে ৪টা সন্তান জন্ম দিছিল। মৰক্কোৰ এগৰাকী মহিলাই যোৱা বছৰ একেলগে ৯টা সন্তান জন্ম দি এক অভিলেখ গঢ়ি তুলিছিল।
Continue Reading
