ডিজিটেল ডেস্কঃ ঘোষণা কৰা হ’ল ভাৰতৰ অন্যতম কঠিন পৰীক্ষা সৰ্বভাৰতীয় লোকসেৱা আয়োগৰ(UPSC) ফলাফল। এই পৰীক্ষাৰ শীৰ্ষৰ চাৰিটা স্থানত আধিপত্য বিস্তাৰ কৰিলে মহিলাই। এইবাৰৰ UPSC পৰীক্ষাত শীৰ্ষস্থান দখল কৰিলে ঈশিতা কিশোৰে। দ্বিতীয় স্থানত গৰিমা লোহিয়া, তৃতীয় স্থানত উমা হৰ্থি এন আৰু চতুৰ্থ স্থানত স্মৃতি মিশ্ৰ।
কেন্দ্ৰীয় লোকসেৱা আয়োগে মঙলবাৰে অসামৰিক সেৱা পৰীক্ষা (UPSC CSE 2022)ৰ চূড়ান্ত ফলাফল ঘোষণা কৰিছে। আই এ এছ পৰীক্ষাত অৱতীৰ্ণ হোৱা প্ৰাৰ্থীয়ে ইউ পি এছ চিৰ অফিচিয়েল ৱেবছাইট www.upsc.gov.in ত চূড়ান্ত ফলাফল চাব পাৰিব। পৰীক্ষাৰ চূড়ান্ত ফলাফলত মুঠ ৯৩৩ গৰাকী পৰীক্ষাৰ্থীক নিযুক্তিৰ বাবে নিৰ্বাচিত কৰা হৈছে। ইয়াৰে ৩৪৫ গৰাকী অসংৰক্ষিত, ৯৯ গৰাকী ই ডব্লিউ এছ, ২৬৩ গৰাকী অ’ বি চি, ১৫৪ গৰাকী এছ চি আৰু ৭২ গৰাকী এছ টি শিতানৰ। ১৭৮ গৰাকী প্ৰাৰ্থীৰ সংৰক্ষিত তালিকাও প্ৰস্তুত কৰা হৈছে। আই এ এছৰ পদত নিৰ্বাচনৰ বাবে ১৮০ গৰাকী প্ৰাৰ্থীক চৰ্টলিষ্ট কৰা হৈছে।
বেটি বচাও বেটি পঢ়াও এই জনপ্ৰিয় শ্লগান যেন আজি খাপে খাপে খাই পৰিছে। আমাৰ দেশৰ কন্যাই আজি শৈক্ষিক ক্ষেত্ৰত দেখুওৱা সফলতাই আন কন্যাসকলোকো নিশ্চয় অনুপ্ৰাণিত কৰিব। যি সময়ত চুবুৰীয়া আফগানিস্তান, পাকিস্তানৰ নাৰীসকলৰ সমমৰ্যাদা ধূলিৰ লগত মিলাই দিবলৈ চেষ্টা চলাই থকা হৈছে, যি সময়ত সেই দেশৰ নাৰীয়ে নিজৰ অধিকাৰৰ বাবে সংগ্ৰাম, শিক্ষা আৰু সম অধিকাৰৰ যুঁজখন চলাই নিবলগীয়া হৈছে সেই সময়তে ভাৰতৰ নাৰীয়ে উৰুৱাই আছে সফলতাৰ নিচান। ইয়াৰ বাবে তেওঁলোকৰ কষ্ট, অধ্যৱসায়ৰ লগতে অভিভাৱকৰ প্ৰেৰণা আৰু ভাৰতীয় সমাজ ব্যৱস্থাও শলাগৰ যোগ্য। জয় ভাৰতীয় নাৰীৰ জয়....
Continue Reading
