ডিজিটেল ডেস্কঃ আজি সৰস্বতী পূজা। মাঘ মাহৰ শুক্ল পক্ষৰ পঞ্চম দিনা বসন্ত পঞ্চমী উৎসৱ পালন কৰা হয়। ধৰ্মীয় বিশ্বাস অনুসৰি এই দিনটোত দেৱী সৰস্বতী আবিৰ্ভাৱ হৈছিল আৰু সেয়েহে বসন্ত পঞ্চমীৰ দিনা মাতৃ সৰস্বতীক পূজা কৰা হয়। ইয়াৰ লগতে যিকোনো নতুন কাম, বিবাহ, ঘৰ সজা আদি শুভ কামো এই দিনটোত কৰা হয়। সৰস্বতী হ'ল জ্ঞান, সংগীত, শিল্পকলা, বুদ্ধি আৰু বিদ্যাৰ হিন্দু দেৱী।
দেৱী সৰস্বতীৰ বন্দনা কৰিবৰ কাৰণে অনুষ্ঠিত কৰা এটা ধৰ্মীয় উৎসৱ। প্ৰতি বছৰে মাঘমাহৰ শুক্লা পঞ্চমী তিথিত এই পূজা পতা হয়। সেইবাবে ইয়াক শ্ৰীপঞ্চমী পূজা বুলিও কয়। এই পূজা বিশেষকৈ শিক্ষানুষ্ঠানসমূহত অনুষ্ঠিত কৰা হয় যদিও বিভিন্ন অনুষ্ঠান, প্ৰতিষ্ঠানেও সৰস্বতী পূজা পালন কৰে।
ছাত্ৰ-ছাত্ৰীসকলৰ লগতে সকলোৱে সুন্দৰকৈ সাজপাৰ পিন্ধি এই পূজাত অংশগ্ৰহণ কৰে। পূজা অথবা নাম প্ৰসঙ্গ শেষ হোৱাৰ পাছত মাহ-প্ৰসাদ বিলোৱা হয়। তাৰপাছতে সকলোৱে চাহ, লুচি-ভাজি, খিচিৰি আদি ভোজন কৰে। ছাত্ৰ-ছাত্ৰী আৰু শিক্ষকসকলে একেলগে প্ৰীতিভোজন কৰে।
প্ৰতি বছৰৰ দৰে এইবেলিও শিক্ষাৰ্থীসকলে দেৱী সৰস্বতীক এই বিশেষ দিনটোত পূজা আগবঢ়াইছে। পুৱাৰে পৰা বাগদেৱীৰ বন্দনাত মুখৰিত হৈ পৰিছে ৰাজ্যৰ স্কুল–কলেজ–বিশ্ববিদ্যালয়সমূহ। প্ৰতিখন স্কুল–কলেজতে পুৱাৰে পৰা দেখা গৈছে উখল–মাখল পৰিৱেশ। বিদ্যাৰ অধিষ্ঠাত্ৰী দেৱী সৰস্বতীৰ শ্ৰীচৰণত সেৱা লৈ নিজৰ শিক্ষা জীৱনৰ সফলতাৰ বাবে প্ৰাৰ্থনা জনাইছে শিক্ষাৰ্থীসকলে।
সৰস্বতী পূজা উপলক্ষে সজাই–পৰাই তোলা হৈছে বিদ্যালয়–মহাবিদ্যালয়সমূহৰ চৌহদ। বাগদেবীৰ মূৰ্তি স্থাপন কৰি পূজাৰ আয়োজন কৰা হৈছে। পুৰোহিতৰ মন্ত্ৰোচ্চাৰণ, ধূপ-চাকিৰ প্ৰজ্বলনৰে এক আধ্যাত্মিক পৰিৱেশ বিৰাজ কৰিছে পূজাথলীসমূহত। ৰাজ্যৰ সকলো প্ৰান্ততে দেখিবলৈ পোৱা গৈছে এনে দৃশ্য।
Continue Reading
