ডিজিটেল ডেস্কঃ আজি সুধাকণ্ঠ ড০ ভূপেন হাজৰিকাৰ জন্মদিন। আমাৰ মাজত থকা হ'লে বিশ্ববিশ্ৰুত শিল্পীগৰাকীয়ে আজি উদযাপন কৰিলেহেঁতেন ৯৬ সংখ্যক জন্মদিন। কায়িকভাৱে ভূপেন হাজৰিকা আমাৰ মাজত নাই যদিও সমগ্ৰ অসমবাসীয়ে তেওঁৰ এই বিশেষ দিনটোত শ্ৰদ্ধাসহকাৰে সোঁৱৰণ কৰিছে। ঠায়ে ঠায়ে সুধাকণ্ঠৰ জন্মদিন পালন কৰি শ্ৰদ্ধা জনাইছে অসমীয়াই।
অসম গৌৰৱ ভূপেন হাজৰিকাৰ ওপজা দিনটোত বিশেষ সন্মান আগবঢ়ালে গুগলে। আজি গুগলৰ ডুডলত জিলিকি উঠিছে ভূপেন হাজৰিকা। অসমৰ বাবে প্ৰতিজন অসমীয়াৰ বাবে এয়া নিশ্চয়কৈ গৌৰৱৰ বিষয়। ভূপেন হাজৰিকাই সংগীত জগতত আগবঢ়োৱা অৱদানক সন্মান জনাবলৈ গুগলে এই পদক্ষেপ হাতত লৈছে। গুগলেও ভূপেন হাজৰিকাৰ জন্মদিন বিশেষ কৰি তুলি অসমবাসীক আহ্লাদিত কৰি তুলিছে। আজি ছ'চিয়েল মিডিয়াতো এই বিষয়টোৱে প্ৰাধান্য পোৱা দেখিবলৈ পোৱা গৈছে।
আজিৰ গুগল ডুডলত ডাঃ ভূপেন হাজৰিকাক চিৰপৰিচিত সেই টুপী পিন্ধি, কান্ধত গামোচা লৈ হাৰমনিয়াম বজাই থকা দেখিবলৈ পোৱা গৈছে। মুম্বাইৰ শিল্পী ৰুতুজা মালিয়ে এই ডুডলটো প্ৰস্তুত কৰিছে। গুগল ইণ্ডিয়াই নিজৰ টুইটাৰ একাউন্টতো ভূপেন হাজৰিকাৰ জন্মদিনক সুঁৱৰিবলৈ এই ডুডলটো সংলগ্ন কৰি এটা পোষ্ট শ্বেয়াৰ কৰিছে।
Continue Reading
