ডিজিটেল ডেস্ক: দেশৰ পৰিবেশ এতিয়া নিৰ্বাচনমুখৰ৷ লোকসভা নিৰ্বাচনক সমুখত ৰাখি আৰম্ভ হৈছে শাসক-বিৰোধীৰ তৎপৰতা৷ বিৰোধী দল কংগ্ৰেছৰ নেতা ৰাহুল গান্ধীয়ে নিৰ্বাচনী পৰিবেশ-প্ৰস্তুতিৰ মাজতে লালু প্ৰসাদ যাদৱৰ পৰা শিকিলে ছাগলী মাংস ৰন্ধাৰ কিটিপ৷
লালু প্ৰসাদ যাদৱৰ কন্যা তথা আৰজেডিৰ সাংসদ মিছা ভাৰতীৰ বাসগৃহত অনুষ্ঠিত হ’ল এখন বিশেষ ভোজ৷ বিশেষ কথাটো হ’ল যে ৰাহুল গান্ধীও ইয়াত উপস্থিত আছিল। এই বিশেষ খাদ্যানুষ্ঠানৰ ভিডিঅ’ ৰাহুল গান্ধীয়ে নিজেই তেওঁৰ ইউটিউব চেনেলত শ্বেয়াৰ কৰিছে৷
মুম্বাইত বিৰোধী দল ‘ইণ্ডিয়া’ৰ তৃতীয়খন বৈঠকৰ এদিন পাছতে কংগ্ৰেছ নেতা ৰাহুল গান্ধীয়ে ৰাষ্ট্ৰীয় জনতা দলৰ (আৰজেডি) মুৰব্বী লালু প্ৰসাদ যাদৱ আৰু তেওঁৰ পৰিয়ালৰ সৈতে তেওঁৰ জীয়েক আৰু আৰজেডি সাংসদ মিছা ভাৰতীৰ বাসগৃহত তেওঁৰ বিশেষ বৈঠকৰ এটা ভিডিঅ’ শ্বেয়াৰ কৰে। খাদ্য আৰু ৰাজনীতিৰ কথা কওঁতে ৰাহুল গান্ধী আৰু লালু প্ৰসাদ যাদৱে ভাৰতীয় জনতা পাৰ্টিক সমালোচনা কৰে।
ভিডিঅ’টোত ৰাহুলক লালু প্ৰসাদ যাদৱৰ নিৰ্দেশনাত চম্পাৰণ ষ্টাইলত ছাগলী মাংস ৰন্ধা দেখা গৈছে। ৰাহুল গান্ধীয়ে কৈছিল লালুজী ৰন্ধনৰ এজন চেম্পিয়ন, সেয়েহে মই ভাবিছিলোঁ যে ময়ো শিকিম।
আহাৰ প্ৰস্তুত কৰাৰ পাছত ৰাহুলে কৈছিল যে তেওঁ ভগ্নী প্ৰিয়ংকা গান্ধীৰ বাবেও খাদ্য লৈ যাব। ৰাহুলৰ অনুকৰণীয় ভগ্নীপ্ৰেমকো প্ৰশংসা কৰিছে নেটিজেনে৷
খোৱাৰ মেজত ৰাহুলে লালু প্ৰসাদ যাদৱক সুধিছিল যে বিজেপিয়ে দেশত কিয় ঘৃণা বিয়পাইছে? লালুৱে কয়, ৰাজনৈতিক ক্ষুধা এনে এক বস্তু যি কেতিয়াও সন্তুষ্ট নহয়। তেওঁলোকৰ লক্ষ্য হৈছে সদায় মানুহক তেওঁলোকৰ কৱলত ৰখা। তেওঁলোকে তেওঁলোকৰ ঘৰ, তেওঁলোকৰ ধন জ্বলাই দিয়ে আৰু সদায়ে তেওঁলোকক নিয়ন্ত্ৰণ কৰিব বিচাৰে।
তেতিয়া ৰাহুল গান্ধীয়ে কয়, আমাৰ মিত্ৰতা ভাৰত, বিজেপিৰ বিভাজনমূলক নীতি আৰু ঘৃণাৰ ৰাজনীতিৰ বিৰুদ্ধে থিয় দিছে। ভাৰতে দৰিদ্ৰ, দুৰ্বল আৰু সংখ্যালঘুসকলৰ কণ্ঠস্বৰৰ বাবে থিয় দিছে। সত্যৰ পথত খোজ কাঢ়ি প্ৰেমৰ দোকান খোলাটো আমাৰ সকলোৰে কৰ্তব্য আৰু লক্ষ্য। আজি আমাৰ দেশে মুদ্ৰাস্ফীতি আৰু নিবনুৱাৰ সৈতে যুঁজি আছে। আমি দৈনন্দিন সামগ্ৰীৰ মূল্য হ্ৰাস কৰিবলৈ আৰু নতুন নিযুক্তিৰ সুযোগ সৃষ্টি কৰিবলৈ সম্পূৰ্ণৰূপে প্ৰতিশ্ৰুতিবদ্ধ।
Continue Reading
