ডিজিটেল ডেস্কঃপ্ৰচলিত ৰাজনীতিৰ প্ৰতি অনীহা, বিজেপিৰ ভুল নীতি আদি নানান বিষয়ত মন্তব্য কৰি নিজৰ দলৰেই বহুতৰে মাজত অপ্ৰিয় হৈ পৰা নীতিন গাডকাৰীয়ে এইবাৰ ৰাজনৈতিক স্বাৰ্থত তেওঁৰ নাম ব্যৱহাৰ কৰা বুলি অভিযোগ কৰিছে। বিজেপিৰ এইগৰাকী 'অজাতশত্ৰু' নেতাই এতিয়া দলটোৰ বাবে মূৰৰ বিষ স্বৰূপ হৈ পৰিছে। গাডকাৰীৰ শেহতীয়া এক টুইটে পুনৰ বিজেপি দলটোক শলঠেকত পেলাইছে। এক টুইটত গাডকাৰীয়ে দাবী কৰে, "কিছুমান লোকে ৰাজনৈতিক লাভা লাভৰ বাবে ইচ্ছাকৃতভাৱে মোৰ নামত মিছা প্ৰচাৰ চলাই আছে।" গাডকাৰীয়ে 'কিছুমান মানুহ' বুলি কৈ কাক লক্ষ্য কৰি সৈছে সেয়া এতিয়া চৰ্চাৰ বিষয় হৈ পৰিছে।
শেহতীয়াকৈ, গাডকাৰীৰ এটা পুৰণি ভিডিঅ' ছ'চিয়েল মিডিয়াত ভাইৰেল হৈ পৰিছে। ভিডিঅ’টোত তেওঁ এনেদৰে কোৱা শুনা গৈছে, "কোনো পদত আছো নে নাই সেই বিষয়ত মই গুৰুত্ব নিদিওঁ"। ভিডিঅ'টো টুইট কৰি বিজেপিৰ এটা অংশই ছ'চিয়েল মিডিয়াত প্ৰচাৰ আৰম্ভ কৰে যে নীতিন গাডকাৰীয়ে দলটোৰ কেন্দ্ৰীয় নেতৃত্বক বিশ্বাস কৰিব নোৱাৰা হৈ পৰিছে। অৱশ্যে এটা টুইটত তেওঁ নিজেই দাবীটো খাৰিজ কৰিছে।
গাডকাৰীয়ে দাবী কৰে, "আজি পুনৰ মোৰ বিৰুদ্ধে এক পৰিকল্পিত অভিযান আৰম্ভ হৈছে। কিছুমান মানুহে ৰাজনৈতিক লাভৰ বাবে মোৰ নামত প্ৰচাৰ চলাই আছে। মোৰ বক্তব্যক ভুলকৈ উপস্থাপন কৰা হৈছে। আগন্তুক দিনত, চৰকাৰ, দল আৰু কৰ্মীৰ স্বাৰ্থত এনে অভিযান চলাই থকা সকলৰ বিৰুদ্ধে আইনী ব্যৱস্থা ল'বলৈ আমি কুণ্ঠাবোধ নকৰোঁ"। অৱশ্যে গাডকাৰীয়ে তেওঁৰ বিৰুদ্ধে কোনে অপপ্ৰচাৰ চলাই আছে সেয়া প্ৰকাশ কৰা নাই।
শেহতীয়াকৈ গাডকাৰীক বিজেপিৰ সংসদীয় পৰিষদৰ পৰা বৰ্খাস্ত কৰা হৈছে। সংঘৰ ঘনিষ্ঠ নেতাজন বৰ্তমান নৰেন্দ্ৰ মোদী মন্ত্ৰী সভাৰ এজন জ্যেষ্ঠ সদস্য। তেওঁ এসময়ত দলৰ সভাপতিও আছিল। সাধাৰণতে বিজেপি সভাপতিসকল যেতিয়ালৈকে সক্ৰিয় ৰাজনীতিত থাকে তেতিয়ালৈকে দলৰ সংসদীয় সমিতিত ৰখা হয় ।
কিন্তু গাডকাৰীক আঁতৰ কৰা হৈছে। কিছুদিন পূৰ্বে এক অনুষ্ঠানত ভাষণ দি গাডকাৰীয়ে কৈছিল, "এই চৰকাৰে সঠিক সময়ত সঠিক সিদ্ধান্ত লোৱা নাই"। এনে মন্তব্যৰ বাবেও তেওঁ দলৰ ৰোষত পৰিছে বুলি বহুতে অনুমাণ কৰিছে। তেওঁৰ টুইটৰ পৰা এই কথাও স্পষ্ট হৈছে যে জ্যেষ্ঠ বিজেপি নেতাজনে দল ত্যাগ কৰাৰ কথা ভবা নাই।
Continue Reading
