ডিজিটেল ডেস্কঃ অশোক গেহলট নেতৃত্বাধীন ৰাজস্থানৰ কেবিনেটে শুকুৰবাৰে ৰাজ্যখনত ১৯ খন নতুন জিলা গঠনৰ বাবে এখন উচ্চ পৰ্যায়ৰ সমিতিৰ প্ৰস্তাৱত অনুমোদন জনাইছে। গেহলট চৰকাৰৰ সন্মতিৰ পিছত ৰাজস্থানত এতিয়া জিলাৰ সংখ্যা ৫০ খনলৈ বৃদ্ধি পাব।
ৰাজ্যখনৰ ৰাজধানী জয়পুৰত থকা মুখ্যমন্ত্ৰীৰ বাসভৱনত কেবিনেটৰ গুৰুত্বপূৰ্ণ বৈঠকৰ পিছত মুখ্যমন্ত্ৰী অশোক গেহলটে কয়, "এই নতুন জিলাসমূহে ৰাজ্যখনৰ উন্নয়নত এক নতুন গতি প্ৰদান কৰিব।"
নতুন জিলা গঠনৰ ফলত শাসন ব্যৱস্থা উন্নত হ'ব আৰু বিভিন্ন কামৰ বাবে জিলা সদৰলৈ যাবলৈ দীঘলীয়া দূৰত্ব অতিক্ৰম কৰিব লগা লোকসকলৰ সকাহ হ'ব বুলিও তেওঁ কয়।
জ্যেষ্ঠ কংগ্ৰেছ নেতাজনে সাংবাদিকক এইবুলিও কয় যে নতুন জিলাসমূহৰ দায়িত্বত থকা মন্ত্ৰীসকলে ৭ আগষ্টত আনুষ্ঠানিকভাবে জিলাসমূহৰ শুভাৰম্ভ কৰিব।
নতুন জিলা গঠনৰ বিষয়ে পৰামৰ্শ দিবলৈ যোৱা বছৰ মাৰ্চ মাহত অৱসৰপ্ৰাপ্ত আইএএছ বিষয়া ৰামলুভায়াৰ অধ্যক্ষতাত এখন উচ্চ-পৰ্যায়ৰ সমিতি গঠন কৰা হৈছিল। জয়পুৰ জিলাক জয়পুৰ আৰু জয়পুৰ গ্ৰাম্যত বিভক্ত কৰা হৈছে তথা যোধপুৰ জিলাক যোধপুৰ আৰু যোধপুৰ গ্ৰাম্যত বিভক্ত কৰা হৈছে।
আন নতুন জিলাবোৰ হৈছে অনুপগড়, বালোত্ৰা, বীৱাৰ, দেগ, দিদৱানা-কুচামান, ডুডু, গংগাপুৰ চহৰ, কেক্ৰি, কোটপুতলি-বেহৰোৰ, খাইৰথাল-তিজাৰা, নীম কা থানা, ফালোডি, স্লিম্বাৰ, চেঞ্চোৰ আৰু শ্বাহপুৰা।
Continue Reading
