ডিজিটেল ডেস্কঃ বোম্বাই উচ্চ ন্যায়ালয়ৰ ন্যায়াধীশ ৰোহিত দেওৱে আদালত চলি থকাৰ মাজতে হঠাতে কৰা পদত্যাগে প্ৰতিক্ৰিয়াৰ সৃষ্টি কৰিছে । ৰোহিত দেও উচ্চ ন্যায়ালয়ৰ নাগপুৰ বিচাৰপীঠৰ ন্যায়াধীশ আছিল। তেওঁ ৰাজহুৱাভাৱে আদালতকক্ষতে হঠাতে পদত্যাগৰ কথা ঘোষণা কৰে। তেওঁ সকলোৰে ওচৰত ক্ষমাও বিচাৰে। আদালত কক্ষত উপস্থিত থকা এজন অধিবক্তাই দাবী কৰে যে সকলোৰে সন্মুখত তেওঁ কয়, "আত্মসন্মানৰ সৈতে আপোচ কৰাৰ কোনো প্ৰশ্নই নাই।সেয়ে পদত্যাগ কৰিলো ''
নাগপুৰ বিচাৰপীঠৰ ন্যায়াধীশ ৰোহিত দেওৱে কয়, "মই আদালতত উপস্থিত থকা সকলোৰে ওচৰত ক্ষমা বিচাৰোঁ।" মই কাকো কেতিয়াও গালি দিয়া নাই কাৰণ মই বিচাৰিছিলো সকলোৱে উন্নত হওক। মই কাকো আঘাত কৰিব নিবিচাৰিছিলো কাৰণ আপোনালোক সকলো মোৰ পৰিয়ালৰে অংশ। মই দুঃখিত, মই পদত্যাগ কৰিলো। মই আত্মসন্মানৰ বিৰুদ্ধে একো কৰিব নোৱাৰো। আপোনালোকেও কঠোৰ পৰিশ্ৰম কৰি থাকক। ''
পিছত সাংবাদিকৰ সৈতে হোৱা বাৰ্তালাপত ৰোহিতে কয় যে ব্যক্তিগত কাৰণত তেওঁ পদত্যাগ কৰাৰ সিদ্ধান্ত লৈছে। তেওঁ এইবুলিও কয় যে তেওঁ ভাৰতৰ ৰাষ্ট্ৰপতিলৈ তেওঁৰ পদত্যাগ পত্ৰ প্ৰেৰণ কৰিছে।
২০২২ চনত ন্যায়াধীশ ৰোহিতে দিল্লী বিশ্ববিদ্যালয়ৰ প্ৰাক্তন অধ্যাপক জি এন চাইবাবাক মাওবাদীৰ গোচৰত নিৰ্দোষ সাব্যস্ত কৰিছিল। উচ্চতম ন্যায়ালয়ে অৱশ্যে নাগপুৰ বিচাৰপীঠৰ আদেশ স্থগিত ৰাখিছিল।
ন্যায়াধীশ ৰোহিতে ২০১৭ চনত বোম্বাই উচ্চ ন্যায়ালয়ত ন্যায়াধীশ হিচাপে যোগদান কৰিছিল। তেওঁ ২০২৫ চনৰ ডিচেম্বৰত অৱসৰ গ্ৰহণ কৰাৰ কথা আছিল। ইয়াৰ আগতে তেওঁ ২০১৬ চনত মহাৰাষ্ট্ৰৰ এডভোকেট জেনেৰেল আছিল।
Continue Reading
