ৰাজ্যসভাত গৃহীত হ’ল মহিলা সংৰক্ষণ বিধেয়ক; ৰাজ্যসভাত উপস্থিত সকলো সদস্যই আগবঢ়ালে সমৰ্থন

লোকসভাত এই বিধেয়কখনৰ সপক্ষে ৪৫৪টা আৰু বিৰোধিতা ২টা ভোট  লাভ কৰা হয়৷এই বিধেয়কত লোকসভা আৰু বিধানসভাত মহিলাৰ বাবে ৩৩ শতাংশ সংৰক্ষণ দিয়াৰ ব্যৱস্থা কৰা হৈছে। কেন্দ্ৰীয় আইন আৰু ন্যায় মন্ত্ৰী অৰ্জুন ৰাম মেঘৱালে ৰাজ্যসভাত উত্থাপন কৰিছিল।এই সময়ছোৱাত অৰ্জুন ৰাম মেঘৱালে কয় যে এই বিধেয়কখন মহিলা সবলীকৰণৰ সৈতে জড়িত আৰু ই আইনত পৰিণত হোৱাৰ পাছত ৫৪৩ জনীয়া লোকসভাত বৰ্তমানৰ মহিলা সদস্যৰ সংখ্যা ৮২ৰ পৰা ১৮১লৈ বৃদ্ধি পাব। লগতে বিধানসভাত মহিলাৰ বাবে ৩৩ শতাংশ আসন সংৰক্ষিত কৰা হ’ব।ইয়াৰ অধীনত অনুসূচিত জাতি-জনজাতিৰ মহিলাসকলেও সংৰক্ষণ লাভ কৰিব বুলিও তেওঁ কয়। সেয়েহে লোকপিয়ল আৰু সীমা নিৰ্ধাৰণ গুৰুত্বপূৰ্ণ। বিধেয়কখন গৃহীত হোৱাৰ লগে লগে লোকপিয়ল আৰু সীমা নিৰ্ধাৰণ কৰা হ’ব। এয়া এক সাংবিধানিক প্ৰক্ৰিয়া। কোনবোৰ আসন মহিলাৰ হাতলৈ যাব সেইটো নিৰ্ধাৰণ কৰিব সীমা নিৰ্ধাৰণ আয়োগে। বৃহস্পতিবাৰে ৰাজ্যসভাত মহিলা সংৰক্ষণ বিধেয়ক সন্দৰ্ভত দীৰ্ঘদিনীয়া আলোচনা চলিছিল।