বন্ধ কৰি দিয়া হ’ল আমেঠীস্থিত সঞ্জয় গান্ধী চিকিৎসালয় ; কংগ্ৰেছে আনিলে প্ৰতিশোধপৰায়ণতাৰ অভিযোগ

ইণ্ডিয়ান এক্সপ্ৰেছত প্ৰকাশিত এক বাতৰি অনুসৰি ১৪ ছেপ্টেম্বৰৰ পুৱা পেটৰ বিষৰ ভুগি থকা এগৰাকী ২২ বছৰীয়া মহিলাক সঞ্জয় গান্ধী হাস্পতালত ভৰ্তি কৰোৱা হৈছিল। কিন্তু, পিত্তস্থলীৰ অস্ত্ৰোপচাৰৰ পূৰ্বে তেওঁৰ অৱস্থাৰ অৱনতি ঘটিছিল, তেতিয়া তেওঁক লক্ষ্ণৌৰ এখন ব্যক্তিগত চিকিৎসালয়লৈ প্ৰেৰণ কৰা হৈছিল। য'ত ১৬ ছেপ্টেম্বৰত মহিলাগৰাকীৰ মৃত্যু হয়। মহিলাগৰাকীৰ পৰিয়ালৰ অভিযোগ যে সঞ্জয় গান্ধী চিকিৎসালয়ত এনাস্থেচিয়াৰ অতিমাত্ৰা প্ৰয়োগৰ বাবে মহিলাগৰাকীৰ মৃত্যু হয়। এই সন্দৰ্ভত ১৭ ছেপ্টেম্বৰত এফআইআৰ ৰুজু কৰা হৈছিল। মহিলাগৰাকীৰ মৃত্যুৰ লগে লগে চিকিৎসালয়খনৰ মুখ্য কাৰ্যবাহী বিষয়াকে ধৰি চাৰিজন কৰ্মচাৰীৰ বিৰুদ্ধে চিকিৎসাৰ সময়ত গাফিলতিৰ বাবে মৃত্যুৰ গোচৰ আৰক্ষীয়ে ৰুজু কৰে ৷

এই বিষয়ৰ প্ৰতি লক্ষ্য ৰাখি আমেঠীৰ জিলা স্বাস্থ্য বিষয়াই তদন্তৰ নিৰ্দেশ দি অতিৰিক্ত মুখ্য চিকিৎসা বিষয়াৰ নেতৃত্বত তিনিজনীয়া তদন্তকাৰী দল গঠন কৰে। ১৮ ছেপ্টেম্বৰত জিলা স্বাস্থ্য বিষয়াসকলে কয় যে চিকিৎসাৰ সময়ত গাফিলতিৰ পপ্ৰমাণ পোৱা গৈছে আৰু সেয়েহে চিকিৎসালয়খনৰ অনুজ্ঞাপত্ৰ স্থগিত ৰখা হৈছে।আদেশৰ পিছদিনা অৰ্থাৎ ১৯ ছেপ্টেম্বৰত ইউ পিৰ উপ মুখ্যমন্ত্ৰী তথা স্বাস্থ্যমন্ত্ৰী ব্ৰজেশ পাঠকে কয় যে প্ৰাৰম্ভিক তদন্তত পোৱা অভাৱৰ ভিত্তিত ক্লিনিকেল এক্টৰ অধীনত স্পষ্টীকৰণ বিচাৰি চিকিৎসালয় প্ৰশাসনক জাননী জাৰি কৰা হ’ব। লগতে তেওঁ আৰু কয় যে যদিহে গাফিলতিৰ তথ্য প্ৰমাণ পোৱা যায় তেন্তে চিকিৎসালয়খন ছীল কৰা হ’ব।