ডিজিটেল ডেস্কঃ লোকসভা নিৰ্বাচনৰ ফলাফলৰ পূৰ্বে সাধাৰণ জনতাই মুদ্ৰাস্ফীতি সন্দৰ্ভত ডাঙৰ জোকাৰণিৰ সন্মুখীন হৈছে। ‘আমুল’ ব্ৰেণ্ডৰ অধীনত দুগ্ধজাত সামগ্ৰীৰ বজাৰ কৰা গুজৰাট সমবায় গাখীৰ বিপণন ফেডাৰেচনে সোমবাৰৰ পৰা অৰ্থাৎ আজিৰ পৰা সমগ্ৰ দেশতে প্ৰতি লিটাৰত প্ৰায় ২ টকাকৈ গাখীৰৰ মূল্য বৃদ্ধি কৰিছে। ইয়াৰ বাবে দেশৰ সকলো বজাৰতে আমুল গাখীৰৰ পাউচৰ মূল্য প্ৰতি লিটাৰত ২ টকাকৈ বৃদ্ধি পাইছে।
জিচিএমএমএফে গভীৰ নিশা প্ৰকাশ কৰা এক বিবৃতিত কয় যে প্ৰতি লিটাৰত ২ টকা বৃদ্ধিৰ ফলত সৰ্বোচ্চ খুচুৰা মূল্য তিনিৰ পৰা চাৰি শতাংশ বৃদ্ধি পাব, যিটো গড় খাদ্যৰ মুদ্ৰাস্ফীতিতকৈ বহু কম।
লোকসভা নিৰ্বাচনৰ ভোটগ্ৰহণ প্ৰক্ৰিয়া সম্পূৰ্ণ হোৱাৰ পিছতে এই মূল্যবৃদ্ধিৰ কথা ঘোষণা কৰা হৈছে।
জিচিএমএমএফে জনোৱা মতে, ২০২৩ চনৰ ফেব্ৰুৱাৰী মাহৰ পৰা গাখীৰৰ দাম বৃদ্ধি কৰা নাই। জিচিএমএমএফে কয় যে, “এই মূল্য বৃদ্ধিৰ কাৰণ হৈছে গাখীৰৰ উৎপাদন আৰু পৰিচালনাৰ মুঠ ব্যয় বৃদ্ধি...।”
আপোনালোকক জনাওঁ যে আমুল দেশৰ আগশাৰীৰ গাখীৰ যোগানকাৰী কোম্পানী।
Continue Reading
