ডিজিটেল ডেস্কঃ বিশ্বত সকলো হিংসাৰেই যেন প্ৰথম বলি মহিলা আৰু শিশুসকলেই হয়৷ এইক্ষেত্ৰত ব্যতিক্ৰম হোৱা নাই মণিপুৰো৷ মণিপুৰত দুগৰাকীকৈ কুকি মহিলাক ধৰ্ষণৰ পিছত উলংগ কৰি পেৰেড কৰোৱাৰ ঘটনাই সমগ্ৰ দেশতে তীব্ৰ প্ৰতিক্ৰিয়াৰ সৃষ্টি কৰিছে৷ বহুতেই ঘটনাটোত প্ৰতিক্ৰিয়া ব্যক্ত কৰিছে৷ একে সময়তে মণিপুৰৰ ঘটনাকলৈ উদ্বিগ্নতা প্ৰকাশ কৰিছে ঝাৰখণ্ডৰ মুখ্যমন্ত্ৰী হেমন্ত সোৰেনেও।
দুগৰাকীকৈ মহিলাৰ নগ্ন পেৰেড কৰোৱাৰ ঘটনাকলৈ মুখ্যমন্ত্ৰীগৰাকীয়ে ৰাষ্ট্ৰপতি দ্ৰৌপদী মূৰ্মুলৈ এখন পত্ৰ লিখিছে।
পত্ৰ খনত সোৰেনে লিখিছে-মণিপুৰ ৰাজ্যত হিংসাত্মক ঘটনা... মণিপুৰৰ ক্ৰমবৰ্ধমান পৰিস্থিতিৰ বাবে মই গভীৰভাৱে দুখিত আৰু চিন্তিত... মহিলাসকলৰ ওপৰত অকথ্য অত্যাচাৰ আৰু যৌন শোষণ চলোৱা হৈছে...মণিপুৰ দুমাহ ধৰি জ্বলি আছে, হৃদয় বিহ্বল কৰা ভিডিঅ' দেখা গৈছে আৰু উত্তৰ-পূবৰ ৰাজ্যখনত গণতান্ত্ৰিক শাসনৰ ভাঙোন আৰম্ভ হৈছে।। তেওঁ ৰাষ্ট্ৰপতিক মণিপুৰৰ জনসাধাৰণৰ বাবে ন্যায় নিশ্চিত কৰিবলৈ আৰু তাত শান্তি পুনঃস্থাপন কৰিবলৈ আহ্বান জনায়।পত্ৰ খনত তেওঁ লিখিছে " মণিপুৰ আৰু ভাৰতে সন্মুখীন হোৱা এই আন্ধাৰ সময়ৰ সংকটৰ সময়ত, আমি আপোনাক আশা আৰু অনুপ্ৰেৰণাৰ অন্তিম উৎস হিচাপে চাইছো। যিয়ে মণিপুৰৰ জনসাধাৰণ আৰু ভাৰতৰ সকলো নাগৰিকক এই সমস্যাৰ সময়ত পোহৰ দেখুৱাব পাৰে,"৷
সোৰেনে লগতে জনজাতীয় ভনীসকলৰ সুৰক্ষা নিশ্চিত কৰিবলৈও ৰাষ্ট্ৰপতিক আহ্বান জনায়৷
Continue Reading
