ডিজিটেল ডেস্কঃ দলৰ প্ৰশিক্ষক ফাৰ্ণান্ডো চাণ্টোছৰ স’তে সংঘাতত লিপ্ত হোৱা বুলি ব্যাপক চৰ্চা চলি থকাৰ সময়তে এই লৈ মুখ খুলিছে ক্ৰিষ্টিয়ানো ৰোণাল্ডোৱে। স্পষ্টকৈ তেওঁ জনালে যে দলৰ একতাক ভাঙিবলৈকে এই অপপ্ৰচাৰ কৰা হৈছে।
সামাজিক মাধ্যমযোগে বৃহস্পতিবাৰে ৰোণাল্ডোৱে লিখে- “বাহিৰৰ কিছু শক্তিয়ে এটা ঐক্যবদ্ধ দলক ভাঙি পেলোৱাৰ চেষ্টা কৰিছে। কিন্তু এই দলটোৱে বাহিৰৰ কোনো শক্তিক ভয় নাখায়। সপোন পূৰণ কৰাৰ বাবে শেষ পৰ্যন্ত দলে চেষ্টা কৰি যাব। আমাৰ ওপৰত বিশ্বাস ৰাখক।”
উল্লেখ্য যে শেহতীয়াকৈ এখন পৰ্তুগীজ কাকতৰ এটা প্ৰতিবেদনে বিৰাট হট্টগোলৰ সৃষ্টি কৰিছিল। তাত লিখা হৈছিল যে প্ৰশিক্ষকৰ স’তে সংঘাতৰ বাবে ৰোণাল্ডোৱে সোনকালেই বিশ্বকাপ এৰি দেশলৈ ঘূৰি আহিব। তাৰ পাছতে ৰোণাল্ডোৱে দিয়া এই ভাষ্যই ব্যাপক তাৎপৰ্য বহন কৰিছে।
ৰোণাল্ডোৰ এই ভাষ্যৰ অনুৰূপধৰণে পৰ্তুগীজ ফুটবল সংস্থাইও এটা বিবৃত্তি প্ৰকাশ কৰিছে। লিখিছে- “জাতীয় দল আৰু দেশৰ সেৱা কৰাৰ ক্ষেত্ৰত ৰোণাল্ডোৱে কীৰ্তি অৰ্জন কৰিছে। সেয়া সমীহ কৰা উচিত আৰু জাতীয় দলৰ প্ৰতি তেওঁৰ দায়বদ্ধতাক লৈ কোনেও প্ৰশ্ন কৰা উচিত নহয়।”
“এই বিশ্বকাপ যাতে পৰ্তুগালৰ ফুটবলৰ ইতিহাসত শ্ৰেষ্ঠ বিশ্বকাপ হিচাপে পৰিগণিত হয়, তাৰ বাবে সমস্ত ফুটবলাৰ, প্ৰশিক্ষক প্ৰথম দিনৰে পৰাই দায়বদ্ধ।”- সংস্থাই লিখে।
উল্লেখ্য যে চলিত বিশ্বকাপত আশানৰূপ প্ৰদৰ্শন আগবঢ়াব পৰা নাই ৩৭ বৰ্ষীয় তাৰকাগৰাকীয়ে। বিশ্বকাপৰ সমান্তৰালভাৱে মানচেষ্টাৰ ইউনাইটেডৰ পাছত কোন ক্লাবলৈ ৰোণাল্ডো যাব, সেই লৈও চৰ্চা চলি আছে।
Continue Reading
