ডিজিটেল ডেস্ক
প্ৰতিবছৰে ভাৰতবৰ্ষত অন্ধবিশ্বাসৰ বলি হৈ বহু কন্যা শিশুয়ে মৃত্যু সাৱতি লয়৷ বহু নাৰী ধৰ্ষণৰ বলি হয়৷ প্ৰকৃতাৰ্থত নাৰীক আজিও হেয় জ্ঞান কৰা হয় ভাৰতীয় সমাজৰ বিভিন্ন প্ৰান্তত ৷ কিন্তু এইখন ভাৰতৰে বিশিষ্ট পাইলট কেপ্তেইন জয়া আগৰৱালে সমগ্ৰ দেশলৈ গৌৰৱ কঢ়িয়াই আনিছে৷
এয়াৰ ইণ্ডিয়াৰ বিমান ব’য়িং -৭৭৭ ৰ পাইলট জয়ায়ে আমেৰিকা যুক্তৰাষ্ট্ৰৰ এছ এফ অ’ বিমান সংগ্ৰহালয়ত স্থান লাভ কৰিবলৈ সক্ষম হৈছে৷
নৰ্থ পুলৰ ওপৰৰে বিমান চলোৱা প্ৰথম গৰাকী ভাৰতীয় মহিলা পাইলট ৰূপে স্বীকৃত হয় জয়া। তেওঁ প্ৰায় ১৬,০০০ কিলোমিটাৰৰ অভিলেখ ভংগ কৰিবলৈয়ো সক্ষম হৈছে৷ ২০২১ চনত জয়া আগৰৱালৰ নেতৃত্বত এয়াৰ ইণ্ডিয়াৰ এক মহিলা পাইলটৰ দলে আমেৰিকাৰ এছ এফ অ’ৰ পৰা ভাৰতৰ বাংগালোৰ চহৰলৈকে নৰ্থ পুল অতিক্ৰম কৰি ভাৰতৰ আটাইতকৈ দীঘল আকাশী পথ অতিক্ৰম কৰিছিল৷
ছাদত বহি আকাশৰ তৰা চাই পাইলট হোৱাৰ সপোন দেখা আঠ বছৰীয়া ছোৱালীজনীয়ে এতিয়া দেশৰ বহু নাৰীক অনুপ্ৰেৰণা দিছে। নতুন সপোন দেখিবলৈ বাট দেখুৱাইছে৷ ইয়াৰ পূৰ্বেও ২০১৩ চনত জয়ায়ে ভাৰতৰ কনিষ্ঠতম পাইলট হিচাপেও স্বীকৃতি লাভ কৰিছিল৷ ২০১৫ চনত নিউয়ৰ্কলৈ গৈ থকা অৱস্থাত এগৰাকী যাত্ৰীৰ জীৱন ৰক্ষা কৰিছিল তেওঁ৷
উল্লেখযোগ্য যে , এই সন্মান লাভ কৰা জয়া একমাত্ৰ জীৱিত মহিলা৷ তেওঁৰ এনে অসাধাৰণ কেৰিয়াৰ আৰু সমগ্ৰ বিশ্বতে নাৰী শক্তিৰ বিকাশ সাধন কৰাৰ বাবে এই সন্মান প্ৰদান কৰা হৈছে৷
এই সন্মান লাভ কৰি নথৈ আনন্দিত হৈ পৰিছে জয়া আগৰৱাল৷ আমেৰিকায়ে এগৰাকী ভাৰতীয়ক সংগ্ৰহালয়ত স্থান দিয়াৰ বাবে যথেষ্ট গৌৰৱান্বিত হৈ পৰিছে জয়া৷ লগতে এইয়া নিজৰ দেশ ভাৰতবৰ্ষৰ বাবে এক মহান ক্ষণ বুলিও মন্তব্য কৰে জয়া আগৰৱালে৷
Continue Reading
