ডিজিটেল ডেস্ক: দেওবাৰে পোহৰৰ উৎসৱ দীপাৱলী। দীপাৱলীক লৈ এতিয়া সমগ্ৰ দেশতে উৎসৱমুখৰ পৰিৱেশ। দেশৰ চহৰে–নগৰে, গাঁৱে–ভূঞে এতিয়া দীপাৱলীৰ প্ৰস্তুতি তুংগত। ইপিনে, দেশৰ লগতে পোহৰৰ উৎসৱ দীপাৱলীক লৈ বিদেশতো উছাহ–উদ্দীপনা।
আমেৰিকা, ইংলেণ্ড, কানাডাৰ দৰে দেশত পালন কৰা হ’ল পোহৰৰ উৎসৱ। আমেৰিকাৰ প্ৰখ্যাত নিউয়ৰ্ক চহৰত দীপাৱলীৰ চমক। ইংলেণ্ডৰ বহুকেইখন চহৰতো পোহৰৰ উৎসৱৰ বিশেষ আয়োজন। ভাৰতৰে সম্পৰ্কত জটিলতা আহি পৰিলেও দীপাৱলীক লৈ পিছ পৰি ৰোৱা নাই কানাডা।
ইতিমধ্যে বিশ্বৰ বহুকেইখন ৰাষ্ট্রৰ ৰাষ্ট্র প্ৰধানে আয়োজন কৰিলে পোহৰৰ উৎসৱৰ। দীপাৱলী উৎসৱ পালনৰ সময়তে পাৰ্লিয়ামেণ্ট হিলত উত্তোলন কৰা হয় ঔম লিখিত বিশেষ পতাকা। আনহাতে আমেৰিকাতো উপ–ৰাষ্ট্রপতি কমলা হেৰিছে উদযাপন কৰে দীপাৱলী। আমেৰিকা–ব্ৰিটেইন আৰু কানাডাৰ বাবে দীপাৱলী উৎসৱৰ আছে বিশেষ ৰাজনৈতিক গুৰুত্বও।
তথ্য অনুসৰি ২০২১ চনৰ লোকপিয়ল অনুসৰি কানাডাত আছে ১৬ লাখ ভাৰতীয়মূলৰ লোক। যাৰ ভিতৰত ৮.২৮ লাখ হৈছে হিন্দু সম্প্ৰদায়ৰ। কানাডাৰ ভোট বেংকৰ ৰাজনীতিত এইসকল ভোটাৰৰ আছে অপৰিসীম গুৰুত্ব। আনহাতে, আমেৰিকাত আজিৰ তাৰিখত দেশখনৰ মুঠ জনসংখ্যাৰ ০.৭ শতাংশ হৈছে হিন্দু সম্প্ৰদায়।
শিক্ষা, আৰ্থিক দিশৰ লগতে আমেৰিকাৰ ৰাজনীতিত আছে এই বৃহৎ হিন্দু সম্প্ৰদায়ৰ যথেষ্ট গুৰুত্ব। একেদৰে, ব্ৰিটেইনৰ ৬.৭ কোটি জনসংখ্যাৰ ১.৭ শতাংশ হৈছে হিন্দু সম্প্ৰদায়ৰ। প্ৰায় ১২ লাখ হিন্দু লোকে বাস কৰা ব্ৰিটেইনৰ বহু সংসদীয় সমষ্টিত হিন্দু ভোটে যথেষ্ট প্ৰভাৱ বিস্তাৰ কৰি আহিছে। যাৰ বাবে এইসমূহ ৰাষ্ট্রৰ ৰাষ্ট্র প্রধানে এনেদৰে হিন্দু ভোটাৰক আকৰ্ষিত কৰিবৰ বাবে উৎযাপন কৰি আহিছে ভাৰতীয় উৎসৱৰ।
Continue Reading
