আমেৰিকা যুক্তৰাষ্ট্ৰৰ ৬ ৰাজ্যত টৰ্ণেডোৰ তাণ্ডৱ, নিহত শতাধিক

ৱাশ্বিংটনঃ বিধ্বংসী টৰ্ণেডোই জোকাৰি গ’ল আমেৰিকা। আমেৰিকা যুক্তৰাষ্ট্ৰৰ ৬খন ৰাজ্যত ভয়ংকৰ টৰ্ণেডোৰ ফলত কেৱল কেনটাকীতে ৭০ জনৰো অধিক লোক নিহত হোৱাৰ খবৰ আহি পৰিছে। প্ৰায় ৩২২ কিলোমিটাৰ বেগত অহা ধুমুহাৰ ফলত অসংখ্য ঘৰ, দোকান-পোহাৰ ক্ষতিগ্ৰস্ত হৈছে বুলি সংবাদ মাধ্যমত প্ৰকাশ পাইছে। স্থানীয় প্ৰশাসনে সদৰী কৰা মতে, কেনটাকীৰ বিভিন্ন ঠাইত ৪টা টৰ্ণেডোই আঘাত কৰিছিল।

এটা টৰ্ণেডোৰ গতি বেগ আছিল প্ৰতি ঘণ্টাত প্ৰায় ৩৬৫ কিলোমিটাৰ । কেনটাকীৰ উপৰি, টৰ্ণেডোই মিছৌৰী, আৰ্কানচাছ, ইলিনয়, টেনেচি আৰু মিচিচিপিতো প্ৰচণ্ড আঘাত কৰা বুলি জানিবলৈ পোৱা গৈছে। প্ৰতিখন চহৰতে মৃত্যুৰ সংখ্যাই শতকৰ ঘৰ অতিক্ৰম কৰিছে । কেনটাকীৰ গভৰ্ণৰ এণ্ডি বেচাৰে কয়, ‘মই কেতিয়াও এনে ধৰণৰ বিধ্বংসী ধুমুহা দেখা নাই। কেনটাকীত আধা মিলিয়নতকৈও অধিক লোকৰ এতিয়ালৈকে মৃত্যু হৈছে।

’ পৰিস্থিতিৰ সৈতে মোকাবিলা কৰিবলৈ ১৮৯ জন ৰাষ্ট্ৰীয় সুৰক্ষা কৰ্মী প্ৰেৰণ কৰা হৈছে বুলিও জনাইছে বেচাৰে। এই বিধ্বংসী ধুমুহাৰ ফলত সৰু চহৰ মেফিল্ডোত যথেষ্ট ক্ষতিগ্ৰস্ত হোৱা বুলি জানিবলৈ পোৱা গৈছে। বেচেৰে লগতে কয়, ‘টৰ্ণেডোই অঞ্চলটোত থকা এটা মমবাতিৰ কাৰখানা খুন্দা মাৰিছিল। সেই সময়ত তাত প্ৰায় ১১০জন লোক কৰ্মৰত অৱস্থাত আছিল। ইফালে, আমেৰিকা যুক্তৰাষ্ট্ৰৰ ৰাষ্ট্ৰীয় বতৰ সেৱাৰ ষ্টৰ্ম ফৰকাষ্টিং চেণ্টাৰৰ বতৰ বিজ্ঞানী ৰজাৰ এডৱাৰ্ডে এনে বিধ্বংসী কাণ্ডক দুৰ্ভাগ্যজনক আখ্যা দিছে।