ডিজিটেল ডেস্কঃ চীনে জাপান আৰু টাইৱানৰ ওপৰেৰে চোৰাংচোৱা বেলুন উৰুৱালে। এই দাবী কৰিলে বিবিচিয়ে। প্ৰতিবেদন অনুসৰি টকিঅ’ই নিশ্চিত কৰিছে যে জাপানৰ ভূখণ্ডৰ ওপৰেৰে এনে বেলুন উৰি গৈছে। ভৱিষ্যতে এনেধৰণৰ বেলুন মাটিলৈ নমাবলৈ সাজু বুলি জাপানে জনাইছে। অৱশ্যে বিবিচিৰ এই প্ৰতিবেদন সন্দৰ্ভত চীনে কোনো মন্তব্য নকৰিলে।
উল্লেখ্য যে আমেৰিকাৰ আকাশতো চীনে বেলুন উৰুওৱা বুলি বাতৰি প্ৰকাশ পাইচিল। ‘চোৰাংচোৱা’ বেলুন উৰণ পোহৰলৈ অহাৰ পিছতে আমেৰিকা আৰু চীনৰ মাজত পুনৰ তিক্ততা দেখা গৈছিল। ইয়াৰ পিছত চীনে দাবী কৰিছিল যে জানুৱাৰীৰ শেষৰ ফালে আমেৰিকাৰ উত্তৰ-পশ্চিমৰ ওপৰত আকাশত থকা বেলুনটো অসামৰিক বিমান। এই বেলুনটো বতৰৰ দৰে বৈজ্ঞানিক বিষয়ৰ গৱেষণাৰ বাবে ব্যৱহাৰ কৰা হৈছিল।
আমেৰিকান চেণ্ট্ৰেল ইনটেলিজেন্স এজেন্সী (চিআইএ)ৰ ইষ্ট এছিয়াৰ প্ৰাক্তন বিশ্লেষক জন কালভাৰে বিবিচিক জনাইছে যে জাপানৰ আকাশত চীনে বেলুন উৰোৱাটো নতুন কথা নহয়, চীনে কমেও পাঁচ বছৰ ধৰি এনে কাম কৰি আহিছে।
জাপানৰ প্ৰতিৰক্ষা মন্ত্ৰালয়ে বিবিচিক জনাইছে যে চৰকাৰে সকলো সাৱধানতা অৱলম্বন কৰিছে। জাপানৰ ভূখণ্ডৰ নিৰাপত্তা সুনিশ্চিত কৰাৰ লগতে দেশৰ জনসাধাৰণৰ স্বাৰ্থ সুৰক্ষিত কৰাৰ বাবে এই বেলুনবোৰ গুলীয়াই পেলাবলৈও সাজু হৈছে।
Continue Reading
