আমেথিত 'স্মৃতি' হ’বলৈ গৈ আছে ইৰাণী, বৃহৎ জয়ৰ দিশে কংগ্ৰেছ প্ৰাৰ্থী, মাত্ৰ ঘোষণা বাকী

উত্তৰ প্ৰদেশৰ আমেথি আৰু ৰায়বৰেলী  ৰাজনীতিত গান্ধী পৰিয়ালৰ কেন্দ্ৰ হিচাপে পৰিচিত। ২০১৪ চনত স্মৃতি ইৰাণীয়ে ৰাহুল গান্ধীক  ১ লাখৰো অধিক ভোটত পৰাস্ত কৰিছিল।  এই সফলতাৰ পুৰস্কাৰ হিচাপে তেওঁক কেন্দ্ৰীয় মন্ত্ৰালয়ৰ লগতে গুৰুত্বপূৰ্ণ দায়িত্ব  দিয়া হৈছিল। কিন্তু ৫ বছৰৰ ভিতৰত এই সমষ্টিটোত  পৰিৱৰ্তনৰ আভাস দেখা গ’ল। শেহতীয়া খবৰ অনুসৰি এই কেন্দ্ৰত কিশোৰেলাল শৰ্মা প্ৰায় ১ লাখ ২১ হাজাৰ ভোটত আগবাঢ়ি আছে। তেওঁ লাভ কৰিছে ৪ লাখ ১৫ হাজাৰ ৪৫০টা  ভোট। আনহাতে, এই পৰ্যন্ত স্মৃতিয়ে লাভ কৰিছে ২ লাখ ৯৪ হাজাৰ ৫৮১ টা ভোট। সেয়ে আমেথিত এতিয়া 'স্মৃতি' হ’বলৈ গৈ আছে ইৰাণী। 

ৰাজনৈতিক মহলে দাবী কৰিছে যে সাংসদ হোৱাৰ পিছত আমেথিত দিয়া প্ৰতিশ্ৰুতি পূৰণ কৰাত ব্যৰ্থ হৈছিল স্মৃতি ইৰাণী। ইৰাণীয়ে ২০১৯ চনতএইবুলি প্ৰতিশ্ৰুতি দিছিল যে যদি জয়ী হয় তেন্তে ৫০০ টকাৰ চিলিণ্ডাৰ, ১৩ টকীয়া চেনি আৰু বহু সুবিধা দিয়া হ’ব। তেওঁ সেয়া পূৰণ কৰা নাছিল, বৰঞ্চ নিৰ্বাচনৰ পূৰ্বে তেওঁ  উগ্ৰ হিন্দুত্ববাদক নিৰ্বাচনত জয়ৰ  আহিলা হিচাপে ব্যৱহাৰ কৰিছিল, যিটো আমেথিবাসীয়ে ভালদৰে গ্ৰহণ কৰা নাছিল। তদুপৰি আমেথিত কংগ্ৰেছৰ প্ৰত্যাৱৰ্তনৰ আঁৰত আন এক কাৰণ উন্মোচিত হৈছে। ৰাজনৈতিক মহলে দাবী কৰে যে ২০১৯ চনৰ লোকসভা নিৰ্বাচনত এই আসনৰ বাবে বিএছপিয়ে প্ৰাৰ্থী প্ৰক্ষেপ কৰিছিল। যাৰ বাবে ইয়াত দলিত ভোট বিভক্ত হৈছিল। ফলত  ৰাহুলে ৫০ হাজাৰৰো অধিক ভোট হেৰুৱাইছিল।  কিন্তু ২০২৪ চনত বিএছপিয়ে ইয়াত কোনো প্ৰাৰ্থী প্ৰক্ষেপ কৰা নাই। ফলত ইয়াত দলিত ভোট একচেটিয়াভাৱে কংগ্ৰেছৰ হাতলৈ যোৱা বুলি ধাৰণা কৰা হৈছে।   ফলস্বৰূপে 'গান্ধীপৰিয়ালৰ দূৰ্গ ' আমেথিত স্মৃতি ইৰাণী হৈ পৰিল এক স্মৃতি।