আমিষা পেটেলৰ বিৰুদ্ধে গ্ৰেপ্তাৰী পৰোৱানা; কি অপৰাধ অভিনেত্ৰীগৰাকীৰ?

ডিজিটেল ডেস্কঃ আমিষা পেটেল পৰিছে বিপদত। আইনী মেৰপাকত সোমাল বলীউড অভিনেত্ৰী আমিষা পেটেল (Ameesha Patel)। কি দোষ কৰিলে ‘কহোনা প্যাৰ হ্যে’ খ্যাত অভিনেত্ৰীগৰাকীয়ে। আমিষা পেটেলৰ বিৰুদ্ধে প্ৰৱঞ্চনাৰ অভিযোগ উত্থাপিত হৈছে। প্ৰায় ৩২ লাখ টকাৰ বিত্তীয় প্ৰতাৰণাৰ অভিযোগত আমিষাৰ বিৰুদ্ধে জাৰি কৰা হৈছে গ্ৰেপ্তাৰী পৰোৱানা। ইউটিএফ টেলিফিল্ম প্ৰাইভেট লিমিটেড নামৰ সংস্থাটোৱে অভিনেত্ৰীগৰাকীৰ বিৰুদ্ধে আনিছে এই গুৰুতৰ অভিযোগ।

অহা ৪ ডিচেম্বৰৰ ভিতৰত আমিষাক ভূপালৰ আদালতত হাজিৰ হ’বলৈ নিৰ্দেশ দিয়া হৈছে। সংস্থাটোৱে অভিযোগ কৰা অনুসৰি ছবি নিৰ্মাণ কৰাৰ প্ৰতিশ্ৰুতি দি নিজৰ প্ৰযোজনা সংস্থাৰ নামত ৩২লাখ ২৫হাজাৰ টকা লৈছিল আমিষাই। সেয়া পাছত চেকৰ জৰিয়তে ঘুৰাই দিয়ে যদিও সেই চেক বাউন্স হয়। তাৰ পাছতে সংস্থাটোৱে আমিষাৰ বিৰুদ্ধে বিত্তীয় প্ৰতাৰণাৰ গোচৰ ৰুজু কৰে।

উল্লেখ্য বলীউডত আমিষা পেটেলৰ কেৰিয়াৰ সুখদায়ক বুলি ক'ব নোৱাৰি। হৃতিক ৰোশনৰ বিপৰীতে চলচ্চিত্ৰত কেৰিয়াৰ আৰম্ভ কৰিছিল আমিষাই। সেই ছবিখন বলীউদত ব্লকব্লাষ্টাৰ হৈছিল। ইয়াৰ পাছত তেওঁ ছানী দেউলৰ বিপৰীতে ‘গড্ডাৰ-এক প্ৰেম কথা’ত নায়িকাৰ ভূমিকা ৰূপায়ন কৰিছিল। এই ছবিখনেও অপাৰ জনপ্ৰিয়তা লাভ কৰিছিল। ইয়াৰ পাছত তেওঁক কেইখন চিনেমাত দেখা গৈছিল যদিও সেই চিনেমাই আমিষাৰ কেৰিয়াৰ গ্ৰাফ উন্নত কৰিব নোৱাৰিলে। দুখনকৈ ছুপাৰ ডুপাৰ হিট ছবি উপহাৰ দিও বলীউডত তিষ্ঠি থাকিব নোৱাৰিলে তেওঁ। আমিষাৰ বিৰুদ্ধে এয়াই প্ৰথম বিত্তীয় প্ৰৱঞ্চনাৰ অভিযোগ উঠা নাই। ইয়াৰ আগতেও আমিষা পেটেলৰ বিৰুদ্ধে বিত্তীয় প্ৰৱঞ্চনাৰ অভিযোগ উত্থাপিত হৈছিল। ৪ ডিচেম্বৰত অভিনেত্ৰীগৰাকীৰ বিৰুদ্ধে আদালতে কি ৰায় দিয়ে সেয়াহে হ'ব লক্ষ্যণীয়।

আৰু পঢ়কঃ জাতীয় জীৱনৰ সাহ হওক জুবিন, জাতিৰ অৱসাদ ভঙাৰ গান হওক জুবিন