ডিজিটেল ডেস্কঃ ৮১ বছৰৰ পাছত উদ্ধাৰ হৈছে এখন সাগৰত ডুবা জাহাজৰ ভগ্নাৱশেষ। ১৯৪২ চনৰ ১ জুলাইত জাপানৰ পৰা মণ্টেভিডিঅ’ মাৰু নামৰ বিশেষ জাহাজখনে যাত্ৰা কৰিছিল। তাত ১০৬০ৰো অধিক অষ্ট্ৰেলিয়ান যাত্ৰী আছিল। কিন্তু সাগৰত ডুবাৰ ফলত সন্ধানহীন হৈ পৰিছিল যাত্ৰীসকল।
অৱশেষত সেই জাহাজৰ ধ্বংসাৱশেষ উদ্ধাৰ কৰা হ’ল। শনিবাৰে এই কথা সংবাদ মাধ্যমক জনাইছে জাহাজখনৰ অনুসন্ধানৰ দায়িত্বত থকা বিশেষ দলটোৱে।
যাত্ৰীসকলৰ বেছিভাগেই আছিল যুদ্ধবন্দী। কিন্তু সেই জাহাজখনত যুদ্ধবন্দীৰ উপৰিও আন দেশৰ কেইবাজনো সাধাৰণ যাত্ৰীও উপস্থিত আছিল।
ঘটনাক্ৰমে সেইপিনেৰেই এখন আমেৰিকান চাবমেৰিন পাৰ হৈ গৈ আছিল। সেই চাবমেৰিনে ভুলতে জাহাজখনক আক্ৰমণ কৰিছিল। ফলত জাপানী জাহাজখন ডুব যায়। তাত থকা আটাইকেইজন যাত্ৰীৰ মৃত্যু হয়।
দ্বিতীয় বিশ্বযুদ্ধৰ অন্ত পৰাৰ পাছতো জাহাজখন পোৱা নগ’ল। ইয়াৰ মাজতে ৮১ বছৰ পাৰ হৈ গ’ল। অৱশেষত বিশেষ অনুসন্ধান দলৰ প্ৰচেষ্টাত জাহাজখন উদ্ধাৰ কৰা হৈছে।
চাইলেণ্টৱৰ্ল্ডৰ সঞ্চালক জন মুলেনে সংবাদ মাধ্যমৰ আগত কয় যে মণ্টেভিডিঅ’ মাৰু আৱিষ্কাৰে এটা দীঘলীয়া অধ্যায়ৰ অন্ত পেলালে। এতিয়াও আপোনজনৰ খবৰৰ বাবে অপেক্ষা কৰি থকা পৰিয়ালবোৰে এইবাৰ শান্তি পাব।
এই জাহাজখন বিচাৰি উলিওৱাৰ আঁৰত আছে 'চাইলেণ্টৱৰ্ল্ড’ নামৰ এটা সংস্থা। পাঁচ বছৰ ধৰি সংস্থাটোৱে জাহাজখন বিচাৰিবলৈ বিভিন্ন অভিযানৰ পৰিকল্পনা কৰিছিল। ইয়াৰ লগত আছিল নেদাৰলেণ্ডৰ বিশেষ গভীৰ সাগৰীয় চোৱাচিতা সংস্থা ফাগ্ৰো আৰু অষ্ট্ৰেলিয়াৰ প্ৰতিৰক্ষা বিভাগ।
১২ দিনৰ তালাচীৰ অন্তত উদ্ধাৰ হয় জাহাজখন। জাহাজখন সাগৰৰ পৰা ৪ কিলোমিটাৰ তলত ডুব গৈছিল। যিটো আচলতে টাইটানিকতকৈও অধিক গভীৰত।
Continue Reading
