ৰাৱণৰ ৰূপত ৰাহুলঃ বিতৰ্কিত পোষ্টাৰৰ বাবে বিজেপিৰ একাধিক নেতাৰ বিৰুদ্ধে গোচৰ ৰুজুৰ প্ৰস্তুতি কংগ্ৰেছৰ

ৰাজস্থান কংগ্ৰেছৰ সাধাৰণ সম্পাদক যশৱন্ত গুৰ্জাৰে তেওঁৰ আবেদনত ভাৰতীয় দণ্ডবিধিৰ ধাৰা ৪৯৯ ( এজন ব্যক্তিৰ বিৰুদ্ধে মিছা অভিযোগ), ৫০০ (মানহানি) আৰু ৫০৪ (ইচ্ছাকৃত অপমান)ৰ অধীনত বিজেপিৰ নেতা দুজনৰ বিৰুদ্ধে গোচৰ ৰুজু কৰাৰ অনুমতি বিচাৰিছিল। গুৰ্জাৰে জয়পুৰ মেট্ৰ'পলিটান আদালতত  এখন আবেদন দাখিল কৰিছে। আৱেদনখনৰ শুনানি ৯ অক্টোবৰত হ'ব।

উল্লেখ্য যে, ৰাহুল গান্ধীক ৰাৱণৰ চৰিত্ৰত দেখুওৱা এখন পোষ্টাৰ বিজেপিৰ 'এক্স'  হেণ্ডেলত প্ৰকাশ কৰা হৈছিল।  পোষ্টাৰখনে  ৰাজনৈতিক বিতৰ্কৰ সৃষ্টি কৰিছে। কংগ্ৰেছে ইয়াক তীব্ৰ সমালোচনা কৰি কয় যে এনে কাৰ্যকলাপ "গ্ৰহণযোগ্য নহয়" আৰু এয়া "বিপজ্জনক"। আদালতত দাখিল কৰা গুৰ্জাৰৰ আবেদনত কোৱা হৈছে, "অভিযুক্তসকলে ইচ্ছাকৃতভাৱে ৫ অক্টোবৰত অসৎ উদ্দেশ্যৰে পোষ্টটো প্ৰচাৰ কৰিছিল আৰু অভিযুক্তসকলৰ উদ্দেশ্য আছিল কংগ্ৰেছৰ  শুভাকাংক্ষীসকলক বদনাম কৰা আৰু ক্ষতি কৰি  আৰু ৰাজনৈতিক লাভ আদায়  কৰা।" তেওঁ লগতে কয় "বিজেপি নেতাসকলে ইচ্ছাকৃতভাৱে ৰাহুল গান্ধীক ৰাম বিৰোধী আৰু ধৰ্মবিৰোধী হিচাপে চিত্ৰিত কৰিছে ," ।আবেদনকাৰীয়ে আদালতক অভিযুক্ত দুয়োজনৰ বিবৃতি লিপিবদ্ধ কৰিবলৈ আৰু বিষয়টো তদন্ত কৰিবলৈ অনুৰোধ জনাইছে।