ডিজিটেল ডেস্কঃ দেশৰ অন্যতম এখন চহৰ চেন্নাইত সংঘটিত হৈছে এক আজৱ ঘটনা৷ চেন্নাইৰ এজন ফাৰ্মাচী কৰ্মীয়ে শনিবাৰে আৱিষ্কাৰ কৰে যে তেওঁৰ বেংক একাউণ্টত বৃহৎ ৭৫৩ কোটি টকা জমা হৈছে।ব্যক্তিজনৰ নাম মহম্মদ ইদ্ৰিছ৷মহম্মদ ইদ্ৰিছে শুকুৰবাৰে (৬ অক্টোবৰ) তেওঁৰ কোটক মহিন্দ্ৰা বেংক একাউণ্টৰ পৰা এজন বন্ধুলৈ ২০০০ টকা ট্ৰেন্সফাৰ কৰিছিল। এই লেনদেনৰ পাছত তেওঁ নিজৰ একাউণ্টৰ বেলেঞ্চ পৰীক্ষা কৰাৰ সিদ্ধান্ত লয়৷যেতিয়া তেওঁ নিজৰ বেংকৰ বেলেঞ্চ চায় তেতিয়া নিজৰ একাউণ্টত ৭৫৩ কোটি টকা আবিষ্কাৰ কৰে৷
এই অস্বাভাৱিক পৰিঘটনাক লৈ উদ্বিগ্ন হৈ ইদ্ৰিছে এই বিষয়টো বেংকক জনাইছিল আৰু পৰৱৰ্তী সময়ত বেংকটোৱে তেওঁৰ একাউণ্ট ফ্ৰীজ কৰি ৰাখিছিল।তামিলনাডুত এনেধৰণৰ এইটো তৃতীয়টো ঘটনা সংঘটিত হৈছে।পূৰ্বৰ এক ঘটনাত চেন্নাইৰ ৰাজকুমাৰ নামৰ কেব চালক এজনে তেওঁৰ তামিলনাডু মাৰ্কেন্টাইল বেংক একাউণ্টত ৯ হাজাৰ কোটি টকা বেলেঞ্চ থকা বুলি আৱিষ্কাৰ কৰে।এই বিষয়টো উত্থাপন কৰাৰ পাছত তামিলনাড মাৰ্কেন্টাইল বেংকে ভুলটোৰ শুধৰণি কৰে৷আন এক ঘটনা সংঘটিত হয় যেতিয়া থাঞ্জাৱুৰৰ গণেশন নামৰ এজন ব্যক্তিৰ বেংক একাউণ্টত ৭৫৬ কোটি টকা ভুলবশতঃ সোমাই পৰে।
Continue Reading
