ৰান্ধিবলৈ কাটি থ’লে বিষাক্ত ফেঁটী, তাৰ পাছত কি হ'ল ৰান্ধনীৰ?

চীন : কোৱা হয়, সাপৰ সৰু-বৰ নাই। কিন্তু এতিয়া চীনত সংঘটিত হোৱা এটা ঘটনাই এতিয়া ক’বলৈ বাধ্য কৰিছে সাপৰ জীয়া-মৰাও নাই। চীনত সংঘটিত এই ঘটনাৰ বিষয়ে জানিলে হতচকিত হৈ উঠিব আপুনিও। চীনদেশত বিভিন্ন জীৱ-জন্তু তথা সৰীসৃপ ভক্ষণৰ কথা তেনেই সাধাৰণ। দক্ষিণ চীনৰ এখন ৰেষ্টুৰেণ্টত এজন ৰান্ধনীয়ে বিষাক্ত ফেঁটীসাপ এডালৰ ছুপ ৰান্ধিবলৈ মূৰটো কাটি থৈছিল। তাৰ পাছত ৰান্ধনীজনে 'স্নেক ছুপ' তৈয়াৰ কৰাত ব্যস্ত হৈ পৰে।

উল্লেখ্য যে, চীনত 'স্নেক ছুপ' এক জনপ্ৰিয় খাদ্য আৰু ই প্ৰায়বোৰ ৰেঁস্তোৰাতে উপলব্ধ। কাটি থোৱাৰ প্ৰায় ২০ মিনিট পাছত ৰান্ধনীজনে সাপৰ মূৰটো জাৱৰডানীত পেলাবলৈ লওতেই কটা মূৰটোৱে তেওঁক দংশন কৰে আৰু এই বিষাক্ত দংশনৰ পাছতেই ৰান্ধনীজনৰ মৃত্যু ঘটে। এই ঘটনাই তীব্ৰ চাঞ্চল্যৰ সৃষ্টি কৰিছে। এই সন্দৰ্ভত প্ৰতিক্ৰিয়া প্ৰকাশ কৰি আৰক্ষীৰ এজন মুখপাত্ৰই প্ৰকাশ কৰে যে, এয়া অতি ব্যতিক্ৰমী ঘটনা।

চেফগৰাকীৰ ৰক্ষা কৰাৰ বাবে একো কৰিবলগীয়া নাছিল। ইফালে, বিশেষজ্ঞই এই ঘটনা সম্পৰ্কত গুৰুত্বপূৰ্ণ তথ্য সদৰি কৰিছে। তেওঁলোকৰ মতে, সাপৰ দৰে আন কিছুমান সৰীসৃপক হত্যা কৰাৰ এঘণ্টাৰ পাছতো সিহঁতে পুনঃসক্ৰিয় গতিবিধি প্ৰকাশ কৰিব পাৰে। দুৰ্ভগীয়া চেফগৰাকীও তেনে এক দুৰ্ঘটনাৰে চিকাৰ হ’ল।