ডিজিটেল ডেস্ক: টীম ইণ্ডিয়াই ৰচিলে নতুন অভিলেখ৷ আন্তঃৰাষ্ট্ৰীয় টি-২০ ক্ৰিকেটত সবাতোকৈ অধিক মেচত জয়ী হোৱাৰ অভিলেখ গঢ়িলে টীম ইণ্ডিয়াই।
শুকুৰবাৰে অষ্ট্ৰেলিয়াৰ বিৰুদ্ধে টি-২০ মেচখনত জয়ী হৈ এই অভিলেখ গঢ়ে টীম ইণ্ডিয়াই। কালি ৰায়পুৰত অষ্ট্ৰেলিয়াৰ বিৰুদ্ধে ৪ৰ্থ টি-২০ মেচত ভাগ লৈছিল ভাৰতীয় ক্ৰিকেট দলটোৱে।
এই মেচত ২০ ৰাণত ভাৰতে জয়লাভ কৰি শৃংখলা দখল কৰে। ইয়াৰ লগতে সৰ্বাধিক মেচত জয়ী হোৱাৰ বিশ্ব অভিলেখো গঢ়িবলৈ সক্ষম হয়। ভাৰতীয় দলে এতিয়ালৈকে ২১৩খন আন্তঃৰাষ্ট্ৰীয় টি-২০ মেচ খেলিছে। ভাৰতে এতিয়ালৈকে জয়লাভ কৰিছে ১৩৬খন টি-২০ মেচ।
ইয়াৰ বিপৰীতে পৰাজিত হৈছে ৬৭খন মেচত। আনহাতে, এখন মেচ ‘টাই’ হৈছিল। ভাৰতৰ জয়ৰ হাৰ ৬৩ দশমিক ৮৪ শতাংশ।
পূৰ্বে সৰ্বাধিক টি-২০ মেচত জয়ী হোৱাৰ অভিলেখ আছিল পাকিস্তানৰ। পাকিস্তানে এতিয়ালৈকে জয়লাভ কৰিছে ১৩৫খন টি-২০। পাকিস্তানে এতিয়ালৈকে খেলিছে ২২৬খন টি-২০ মেচ।
আন্তঃৰাষ্ট্ৰীয় টি-২০ মেচত সৰ্বাধিক জয়ৰ তৃতীয় স্থানত আছে নিউজিলেণ্ড। নিউজিলেণ্ডে ২০০খন মেচ খেলি ১০২খন মেচত জয়ী হৈছে।
অষ্ট্ৰেলিয়া আৰু দক্ষিণ আফ্ৰিকাই ৯৫খনকৈ মেচত জয়ী হৈছে। অষ্ট্ৰেলিয়াই খেলিছে ১৮১খন টি-২০ আন্তঃৰাষ্ট্ৰীয় মেচ। ইপিনে, দক্ষিণ আফ্ৰিকাই খেলিছে ১৭১খন মেচ।
টীম ইণ্ডিয়া দেওবাৰে পুনৰ অষ্ট্ৰেলিয়াৰ মুখামুখি হ’ব। চলিত ৫খনীয়া শৃংখলাৰ অন্তিমখন মেচ দেওবাৰে বাংগালুৰুত অনুষ্ঠিত হ’ব।
Continue Reading
