ডিজিটেল ডেস্কঃ মানুহজনক সকলোৱে জিলাপী বাবা বুলিয়েই জানে। সাধুৰূপী এই জিলাপী বাবাই ধৰ্ষণ কৰিছিল ১২০ গৰাকীৰো অধিক মহিলাক। সেই অপৰাধতে তেওঁ হৈ আছিল কাৰাবন্দী।হাৰিয়ানাৰ জিলাপী বাবাই মানুহৰ বিশ্বাসৰ সুযোগ লৈ ১২০ গৰাকীতকৈ অধিক মহিলাক ধৰ্ষণ কৰাৰ বাবে ১৪ বছৰৰ কাৰাদণ্ড বিহা হৈছিল। অৱশেষত, হিছাৰৰ কাৰাগাৰত জিলাপী বাবাৰ মৃত্যু হৈছে। যদিও তেওঁৰ নাম বিল্লু ৰাম আছিল, তেওঁ তেওঁৰ ভক্তসকলৰ মাজত জিলাপী বাবা নামেৰে পৰিচিত আছিল। স্বঘোষিত গডমেনজনে প্ৰথমবাৰৰ বাবে ২০১৮ চনত সংবাদ শিৰোনাম দখল কৰিছিল।
পঞ্জাৱৰ মানছা অঞ্চলৰ বাসিন্দা বিল্লু ৰামে জীৱনৰ আৰম্ভণিতে ঠেলাগাড়ী চলাইছিল। তাৰ পিছত তেওঁ হাৰিয়ানালৈ আহিছিল আৰু জিলাপী বিক্ৰী কৰিবলৈ লৈছিল। হঠাতে এদিন তেওঁ নিজকে হাৰিয়ানাৰ হিছাৰ জিলাত এজন স্বঘোষিত গডমেন বুলি ঘোষণা কৰিছিল। জিলাপী বিক্ৰী কৰাৰ বাবেই তেওঁৰ নাম জিলাপী বাবা হৈ পৰিছিল। তেওঁ হিছাৰত এখন আশ্ৰম খুলিছিল। তেতিয়াৰে পৰাই তেওঁ আশ্ৰমলৈ অহা ধুনীয়া, কম বয়সীয়া মহিলা ভক্তসকলক চাহত নিচাযুক্ত দ্ৰব্য মিহলাই অচেতন কৰি ধৰ্ষণ কৰিছিল। ইয়াৰ পিছত গোটেই ঘটনাটোৰ চিত্ৰগ্ৰহণ কৰা হৈছিল। আৰু সেই ভিডিঅ’ৰে মহিলাসকলক ব্লেকমেইল কৰি গৈছিল। ২০১৮ চনত তেনে এটা ভিডিঅ' ছচিয়েল মিডিয়াত ভাইৰেল হোৱাৰ পিছতে জিলাপী বাবা আৰক্ষীৰ জালত পৰে।
ইয়াৰ পিছত আৰক্ষীয়ে ভিডিঅ'টোৰ আধাৰত এটা গোচৰ পঞ্জীয়ন কৰে আৰু তদন্ত আৰম্ভ কৰে। অনুসন্ধানৰ সময়ত, আৰক্ষীয়ে এনে ধৰণৰ অধিক আপত্তিজনক ভিডিঅ' লাভ কৰে। পিছলৈ এটা এটাকৈ সামাজিক মাধ্যমত আৰু অধিক অশ্লীল ভিডিঅ' ভাইৰেল হৈ পৰিছিল। তদন্তৰ সময়ত আৰক্ষীয়ে জানিব পাৰিছিল যে জিলাপী বাবাই ১২০ গৰাকীৰো অধিক মহিলাক ধৰ্ষণ কৰিছিল।তেওঁক ২০২৩ চনত ১৪ বছৰৰ কাৰাদণ্ড বিহা হৈছিল।
স্বঘোষিত গডমেনজনক তেতিয়াৰে পৰা হিছাৰৰ কেন্দ্ৰীয় কাৰাগাৰত ৰখা হৈছিল। কাৰাগাৰৰ সূত্ৰই প্ৰকাশ কৰা অনুসৰি জিলাপী বাবাই হঠাতে বুকুত তীব্ৰ বিষ অনুভৱ কৰিছিল। তাৰ পিছত তেওঁক ততাতৈয়াকৈ কাৰাগাৰৰ চিকিৎসালয়লৈ লৈ যোৱা হৈছিল। তাত থকা চিকিৎসকে তেওঁক মৃত বুলি ঘোষণা কৰে।
Continue Reading
