ৰাস্তাৰ মাজত জীপচী ৰখাই মাৰপিট কৰি ‘হত্যা’ কৰিছিল এজনক; জানক সিদ্ধুৰ বিৰুদ্ধে গোচৰৰ সবিশেষ

ডিজিটেল ডেস্ক : ১৯৮৮ চনৰ এটা গোচৰত এবছৰৰ কাৰাদণ্ড বিহা হ’ল নৱজ্যোৎ সিং সিদ্ধুক। উচ্চতম ন্যায়ালয়ে এই ৰায়দান কৰাৰ পাছতে তীব্ৰ চৰ্চা চলিছে দেশজুৰি। ন্যায়ালয়ৰ এই নিৰ্দেশৰ পাছতে সিদ্ধুক নিজৰ জিম্মাত ল’ব পঞ্জাব আৰক্ষীয়ে। ইয়াৰ পূ্ৰ্বে সিদ্ধুক ১০০০ টকা জৰিমনা বিহা হৈছিল। কিন্তু আজি তেওঁৰ বিৰুদ্ধে থকা অভিযোগৰ ভিত্তিত ভাৰতীয় দণ্ডবিধিৰ ৩২৩নং ধাৰা অনুসৰি তেওঁক সৰ্বোচ্চ শাস্তি বিহা হৈছে। সিদ্ধুৰ দৰে এগৰাকী জনপ্ৰিয় ক্ৰিকেটাৰ তথা এগৰাকী চৰ্চিত ৰাজনীতিকে কিহৰ বাবে এই শাস্তি ভোগ কৰিবলগীয়া হ’ল? কি আছিল সিদ্ধুৰ বিৰুদ্ধে গোচৰ?

১৯৮৮ চনৰ ২৭ ডিচেম্বৰত নৱজ্যোৎ সিং সিদ্ধু আৰু ৰূপিন্দৰ সিং সিদ্ধুৱে পাটিয়ালাৰ শ্বেৰাৱালা গেট-ক্ৰছিঙত মাজ ৰাস্তাতে তেওঁলোকৰ জীপচীখন পাৰ্ক কৰিছিল। সেই সময়তে তাত উপস্থিত হৈছিল ৬৫ বছৰীয়া গুৰনাম সিং। এখন গাড়ীৰে অহা গুৰনামে সিদ্ধুক তেওঁৰ জীপচীখন আঁতৰ কৰিবলৈ অনুৰোধ জনায়। কিন্তু তাকে নকৰি সিদ্ধুৱে লোকজনক প্ৰহাৰ কৰে। তেওঁ আনকি এই কাৰ্য সংঘটিত কৰাৰ পাছতে তাৰ পৰা আঁতৰি যোৱাৰ সময়ত সিঙৰ গাড়ীৰ চাবিও কাঢ়ি লয় যাতে তেওঁ কোনো চিকিৎসা সেৱা লাভ কৰিব নোৱাৰে।

১৯৯৯ চনৰ ছেপ্টেম্বৰ মাহত সিদ্ধুক হত্যাৰ গোচৰত দোষী সাব্যস্ত কৰা হয়। কিন্তু ২০০৬ চনত পঞ্জাব আৰু হাৰিয়ানা উচ্চ ন্যায়লয়ে সিদ্ধু আৰু তেওঁৰ সহযোগীৰ বিৰুদ্ধে উত্থাপিত অভিযোগক ‘অনিচ্ছাকৃত হত্যা’ বুলি আখ্যা দিয়ে যাক অন্য হত্যাৰ সমপৰ্যায়ৰ নহয় বুলি বিবেচনা কৰা হয়। নৱজ্যোৎ আৰু ৰূপিন্দৰৰ ওপৰত এক লাখলৈ টকাৰ জৰিমনা আৰোপ কৰে পঞ্জাব আৰু হাৰিয়ানা উচ্চ ন্যায়ালয়ে।

কিন্তু দুই সিদ্ধুৱে উচ্চতন ন্যায়ালয়ত পাছত এই ৰায়ক প্ৰত্যাহ্বান জনায়। বিভিন্ন প্ৰতিবেদনত প্ৰকাশ কৰা অনুসৰি সিদ্ধুৱে দাবী কৰিছিল যে, তেওঁৰ বিৰুদ্ধে উত্থাপন কৰা প্ৰমাণবোৰ পৰস্পৰবিৰোধী আৰু মেডিকেল ৰিপ’ৰ্ট আছিল অতি অস্পষ্ট।

২০০৭ চনত ন্যায়ালয়ে তেওঁলোকক দোষী সাব্যস্ত কৰি দিয়া ৰায় স্থগিত ৰাখে।

২০১৮ চনৰ ১৫ মে’ত উচ্চতম ন্যায়ালয়ে তেওঁক ভাৰতীয় দণ্ডবিধিৰ ৩২৩ নং আৰু ৩০৪ নং ধাৰাত দোষী সাব্যস্ত কৰে। এই ধাৰা দুটা ইচ্ছাকৃতভাৱে আঘাত কৰা আৰু অনিচ্ছাকৃত হত্যাৰ অভিযোগত আৰোপ কৰা হৈছিল।

২০১৮ চনৰ ১২ ছেপ্টেম্বৰত উচ্চতম ন্যায়ালয়ে পুনৰীক্ষণ আবেদনৰ শুনানি গ্ৰহণৰ বাবে প্ৰস্তুত হয়।

২০২২ চনৰ ২৫ মাৰ্চত এই পুনৰীক্ষণ আবেদনৰ ৰায় সংৰক্ষিত কৰি ৰাখে।

২০২২ চনৰ ১৯ মে’ অৰ্থাৎ আজিৰ দিনটোত সিদ্ধুক এবছৰৰ সশ্ৰম কাৰাদণ্ড বিহা হয়।