ডিজিটেল ডেস্ক: তথ্য জনাৰ অধিকাৰ আইন ২০০৫ৰ আজি অৰ্থাৎ শনিবাৰে ১৯ বছৰ সম্পূৰ্ণ হ’ল। ২০০৫ চনৰ এই দিনটোতে আৰ টি আই আইন আৰম্ভ হয়। কিন্তু এই উপলক্ষে এক প্ৰতিবেদনে উদ্বেগ প্ৰকাশ কৰিছে যে সমগ্ৰ দেশৰ ২৯ টা তথ্য আয়োগত ৪ লাখৰো অধিক আবেদন আৰু অভিযোগ বিচাৰাধীন হৈ আছে।
এই প্ৰতিবেদন প্ৰস্তুত কৰিছে স্বচ্ছতা কৰ্মী অঞ্জলি ভৰদ্বাজৰ নেতৃত্বত নাগৰিক সমাজৰ গোট সতৰ্ক নাগ্ৰিক সংগঠনে। প্ৰতিবেদন অনুসৰি, ২০২৪ চনৰ ৩০ জুনলৈকে দেশৰ বিভিন্ন তথ্য আয়োগত ৪,০৫,৫০৯ টা গোচৰ বিচাৰাধীন হৈ আছে। প্ৰতিবেদনত কোৱা হৈছে যে সৰ্বাধিক ১,০৮,৬৪১ টা আপীল আৰু অভিযোগ মহাৰাষ্ট্ৰ তথ্য আয়োগত বিচাৰাধীন হৈ আছে। ইয়াৰ পিছতে কৰ্ণাটক (৫০,০০০), তামিলনাডু (৪১,২৪১) আৰু ছত্তীশগড় (২৫,৩১৭)।
প্ৰতিবেদনত দেখা গৈছে যে ২০১৯ চনৰ ৩১ মাৰ্চলৈকে ২৬টা তথ্য আয়োগত মুঠ ২,১৮,৩৪৭টা গোচৰ বিচাৰাধীন হৈ আছিল। ২০২২ চনৰ জুন মাহত এই সংখ্যাই ৩ লাখ অতিক্ৰম কৰিছিল। এই বছৰ এই সংখ্যা ৪,০৫,৫০৯ লৈ বৃদ্ধি পাইছে। আনহাতে, ২০২৩ চনৰ ১ জুলাইৰ পৰা ২০২৪ চনৰ ৩০ জুনলৈকে ২৭টা তথ্য আয়োগে ২,৩১,৪১৭টা আপীল আৰু অভিযোগ পঞ্জীয়ন কৰে। একে সময়ছোৱাত ২৮টা আয়োগে ২,২৫,৯২৯টা গোচৰ নিষ্পত্তি কৰে।
অন্য এক চিন্তনীয় কথা পোহৰলৈ আহিছে এই প্ৰতিবেদনত। উল্লেখ্য যে যোৱা এবছৰত ঝাৰখণ্ড, তেলেংগানা, গোৱা, ত্ৰিপুৰা, মধ্যপ্ৰদেশ, উত্তৰ প্ৰদেশ আৰু ছত্তীশগড়ৰ ৭টা তথ্য আয়োগ বিভিন্ন সময়ত নিষ্ক্ৰিয় হৈ আছিল। ইয়াৰে চাৰিটা আয়োগ ঝাৰখণ্ড, তেলেংগানা, গোৱা আৰু ত্ৰিপুৰা এতিয়াও নিষ্ক্ৰিয় হৈ আছে।
কেন্দ্ৰীয় তথ্য আয়োগে প্ৰায় এবছৰ ধৰি মুৰব্বীকে ধৰি মাত্ৰ তিনিজন আয়ুক্তৰে কাম কৰি আছে। প্ৰতিবেদনখনে চিআইচিত বিচাৰাধীন আপীল আৰু অভিযোগৰ প্ৰতি দৃষ্টি আকৰ্ষণ কৰিছে, যিটো ৩০ জুনলৈকে ২২,৭৭৪টা গোচৰ আছিল।
Continue Reading
