বাবৰ আজম এজন স্বাৰ্থপৰ অধিনায়ক! বিশ্বকাপত পাকিস্তানৰ দুৰ্বল প্ৰদৰ্শনক লৈ সৰৱ হ’ল দলটোৰ প্ৰাক্তন ক্ৰিকেটাৰসকল

ডিজিটেল ডেস্কঃ টি২০ বিশ্বকাপত পাকিস্তানে প্ৰথম দুখন খেলত বিপৰ্যস্ত হোৱাৰ পাছতে অধিনায়ক বাবৰ আজমৰ সমালোচনাত মুখৰ হৈছে দেশখনৰ প্ৰাক্তন ক্ৰিকেটাৰসকল। বিশ্বকাপত দেখুওৱা দলৰ দুৰ্বল প্ৰদৰ্শনৰ বাবে বাবৰকে দোষাৰোপ কৰিছে প্ৰাক্তন তাৰকা ৱাছিম আক্ৰম আৰু ৱাকাৰ ইউনিছে।

তেওঁলোকৰ মতে, বাবৰে দলত নিজৰ স্থানক লৈয়েই চিন্তিত। সেয়ে দলে কি খেলিছে তাক লৈ বাবৰৰ কোনো চিন্তা নাই। এনেকুৱা অধিনায়ক থকা বাবেই দলে পৰাজয়ৰ মুখ দেখিছে বুলি তেওঁলোকে কয়।

ৱাছিম আক্ৰমে কয় যে বাবৰ এজন স্বাৰ্থপৰ লোক। কেৱল নিজৰ প্ৰদৰ্শনৰ ওপৰত লক্ষ্য থাকে বাবৰৰ। পাকিস্তানৰ প্ৰাক্তন অধিনায়ক তথা ফাষ্ট বলাৰ ৱাকাৰ ইউনিছেও একে ধৰণৰ মন্তব্য কৰিছে। কয় যে বাবৰ এজন স্বাৰ্থপৰ খেলুৱৈ।

“আইচিচি তালিকাত শীৰ্ষ থকাৰ কোনো গুৰুত্ব নাই। দল জিকাব লাগিব।”- বাবৰৰ প্ৰতি তাচ্ছিল্য কৰি ৱাকাৰ ইউনিছে কয়।

কেৱল এওঁলোকেই নহয়, বাবৰক সমালোচনা কৰিছে পাকিস্তানৰ প্ৰাক্তন তাৰকা কামৰণ আকমল, ইউনিছ খান আৰু ছোৱেইব আখটাৰেও। আখটাৰে বাবৰ আজমক ‘জঘন্য অধিনায়ক’ হিচাপে আখ্যা দিছে। দলীয় চিন্তাক লৈ বাবৰৰ কোনো পৰিকল্পনা নাই বুলি তেওঁ কয়।