‘‘পুনৰ শক্তিশালী হৈ উঠিব পাকিস্তান”! জিম্বাবুৱেৰ হাতত পৰাজীত হৈ অনুভৱ ব্যক্ত কৰিলে বাবৰে

ডিজিটেল ডেস্কঃ আমি বহুত বেয়া খেলিলো। টি২০ বিশ্বকাপত জিম্বাবুৱেৰ হাতত পৰাজীত হৈ এই অনুভৱ ব্যক্ত কৰিছে পাকিস্তানৰ অধিনায়ক বাবৰ আজমে।

“মোৰ দলটোৰ এয়া অত্যন্ত বেয়া প্ৰদৰ্শন। আমি ভালদৰে বেটিং কৰিব নোৱাৰিলো।”- মেচখনৰ পাছত বাবৰে কয়- “প্ৰথম ছয় অভাৰত আমাৰ বিপৰ্যয় হৈছিল। কিন্তু ছাদাব আৰু শ্বান মাচুদে এটা পাৰ্টনাৰশ্বিপ গঢ়ি তুলিছিল। দুৰ্ভাগ্যজনকভাৱে ছাদাব আউট হয় আৰু লগে লগে এটা এটাকৈ উইকেট হেৰুৱাব ধৰো।”

উল্লেখ্য যে মেচখনত জিম্বাবুৱেৰ হাতত মাত্ৰ এটা ৰাণৰ ব্যৱধানত পৰাস্ত হৈছিল পাকিস্তান। প্ৰথম ইনিংছত জিম্বাবুৱেই ১৩০ ৰাণ সংগ্ৰহ কৰাৰ বিপৰীতে পাকিস্তানে সংগ্ৰহ কৰিবলৈ সক্ষম হ’ল ১২৯ ৰাণ।

পাকিস্তানৰ হৈ বাবৰ আজম, মহম্মদ ৰিঝৱানৰ দৰে বাঘা বাঘা বেটছমেন ব্যৰ্থ হোৱাৰ বিপৰীতে ছান মাচুদে সৰ্বোচ্চ ৪৪ ৰাণ সংগ্ৰহ কৰে।

অধিনায়ক বাবৰে কয় যে মেচখনত লাভ কৰা তিক্ত অভিজ্ঞতাসমূহৰ পৰা দলটোৰ খেলুৱৈসকলে শিক্ষালাভ কৰিছে। ইয়াৰ পৰৱৰ্তী মেচখনত পাকিস্তান পুনৰ শক্তিশালী হৈ উঠিব বুলিও তেওঁ কয়।

উল্লেখ্য যে বিশ্বকাপখনত এতিয়ালৈকে দুখন মেচত অংশ লৈ পাকিস্তানে দুয়োখনতে পৰাজীত হৈছে। বিশ্বকাপত প্ৰদৰ্শন কৰা পাকিস্তানৰ দুৰ্বল প্ৰদৰ্শনে সম্প্ৰতি সামাজিক মাধ্যমত ব্যাপকভাৱে চৰ্চিত হৈছে।