ডিজিটেল ডেস্ক; এতিয়াৰে পৰা পেট্ৰ’ল-ডিজেলৰ বাবে প্ৰয়োজন হ’ব প’ল্যুইউশ্যন চাৰ্টিফিকেট৷ প’ল্যুইউশ্যন চাৰ্টিফিকেট অবিহনে তেল ডিপোত নাপাব তেল৷ এক কথাত বাধ্যতামূলক কৰা হৈছে প’ল্যুইউশ্যন চাৰ্টিফিকেট৷ এই নিৰ্দেশনা পিছে অসমৰ নহয়৷ এই নিৰ্দেশনা জাৰি কৰিছে দিল্লী চৰকাৰে৷ দিল্লীত ২৫ অক্টোবৰৰ পৰা প্ৰদূষণ নিয়ন্ত্ৰণ প্ৰমাণপত্ৰ অবিহনে কোনো ইন্ধন নাপাব দিল্লীৰ তেল ডিপোত৷
প্ৰতি বছৰে শীতকাল আৰম্ভ হোৱাৰ লগে লগে দিল্লী-এনচিআৰৰ বাসিন্দাসকলে বছৰটোৰ আটাইতকৈ বেছি প্ৰদূষণৰ সন্মুখীন হয়৷ এইবাৰ দিল্লী চৰকাৰে চহৰখনৰ প্ৰদূষণ নিয়ন্ত্ৰণ কৰিবলৈ এই পদক্ষেপ গ্ৰহণ কৰিছে। এক নতুন নিয়ম অনুসৰি, প্ৰদূষণ নিয়ন্ত্ৰণ প্ৰমাণপত্ৰ (পিইউচিচি) অবিহনে কোনো পেট্ৰ’ল পাম্পে বাহনত পেট্ৰ’ল বা ডিজেল ভৰ্তি নকৰে।
দিল্লীৰ পৰিবেশ মন্ত্ৰী গোপাল ৰায়ে শনিবাৰে নতুন নিয়মটো ঘোষণা কৰিছিল। মন্ত্ৰীজনে কৈছিল যে নতুন আইনখন ২৫ অক্টোবৰৰ পৰা প্ৰযোজ্য হ'ব। চৰকাৰে শীঘ্ৰেই বিষয়টোৰ ওপৰত এখন আনুষ্ঠানিক জাননীও জাৰি কৰিব।
২৯ ছেপ্টেম্বৰত পৰিৱেশ, পৰিবহন আৰু যান-বাহন বিভাগৰ বিষয়াসকলৰ এখন বৈঠকৰ পিছত এই সিদ্ধান্ত লোৱা হৈছে। পেনেলে নতুন নিয়ম আৰু পদ্ধতিবোৰ কেনেদৰে কাৰ্যকৰী কৰিব লাগে সেই বিষয়ে আলোচনা কৰে আৰু ২৫ অক্টোবৰৰ পৰা পৰিকল্পনাটোৰ সৈতে আগবাঢ়ি যোৱাৰ সিদ্ধান্ত লোৱা হয় বুলি মন্ত্ৰীজনে সদৰী কৰে৷
তেওঁ লগতে কয়, দিল্লীত বৰ্ধিত প্ৰদূষণৰ ক্ষেত্ৰত যানবাহনৰ পৰা নিগৰিত ধোঁৱা অন্যতম কাৰক হিচাপে ইতিমধ্যে চিহ্নিত হৈছে৷ ইয়াক হ্ৰাস কৰাটো অত্যাৱশ্যকীয়, সেয়েহে সিদ্ধান্ত লোৱা হৈছে যে ২৫ অক্টোবৰৰ পৰা বাহনখনৰ পিইউচি প্ৰমাণপত্ৰ অবিহনে পেট্ৰ'ল পাম্পত ডিজেল প্ৰদান কৰা নহ'ব৷
মন্ত্ৰীজনে আৰু কৈছিল যে দিল্লী চৰকাৰে প্ৰদূষণৰ বিৰুদ্ধে যুঁজিবলৈ ৩ অক্টোবৰত ২৪×৭ ৱাৰৰূম আৰম্ভ কৰিব। নতুন পেনেলে সংশোধিত গ্ৰেডেড ৰেচপন্স একচন প্লেন বা জিআৰএপিৰ কাৰ্যকৰী আৰু গুৰুত্বপূৰ্ণ ৰূপায়ণ নিশ্চিত কৰিব। ৬ অক্টোবৰৰ পৰা কৰ্তৃপক্ষই ধূলি প্ৰদূষণৰ স্তৰ চাবলৈ নিৰ্মাণ স্থানবোৰৰ আকস্মিক পৰিদৰ্শন কৰিব।
এই বছৰৰ আৰম্ভণিতে মন্ত্ৰীজনে কৈছিল যে চৰকাৰে একে ধৰণৰ পৰিকল্পনাৰ ওপৰত কাম কৰি আছে। অৱশ্যে, তেনে কোনো পৰিকল্পনা বলবৎ কৰা হোৱা নাছিল।
লক্ষ্য কৰা হৈছে মটৰ বাহনসমূহ—
দিল্লী চৰকাৰে সাম্প্ৰতিক সময়ত মটৰ চালকসকলৰ ওপৰত কঠোৰ পদক্ষেপ লৈছে আৰু ইতিমধ্যে এনচিআৰত প্ৰদূষণৰ স্তৰ আৰু বৃদ্ধি নোহোৱাটো নিশ্চিত কৰিবলৈ কেইটামান ব্যৱস্থা আৰম্ভ কৰিছে। মন কৰিবলগীয়া যে নতুন দিল্লীত ১৫ বছৰ পুৰণি পেট্ৰ'ল চালিত বাহন আৰু ১০ বছৰ পুৰণি ডিজেল চালিত বাহনৰ পুনৰ পঞ্জীয়ন বন্ধ হৈছে, যাক অটোমোবাইলৰ পৰা বায়ু প্ৰদূষণৰ এক ডাঙৰ উৎস বুলি গণ্য কৰা হয়।
২০২০ৰ অক্টোবৰৰ পৰা দিল্লী চৰকাৰে পিইউচিৰ নিয়ম অনুসৰণ কৰাৰ বাবে কঠোৰ হৈ পৰিছে। চৰকাৰে ইতিমধ্যে বিভিন্ন পেট্ৰ'ল পাম্পত ৫০০টা দল মোতায়েন কৰিছে যাতে এই অভিযানে ইতিবাচক ফলাফল লাভ কৰে আৰু ৰাইজৰ মাজত সাধাৰণ সজাগতা সৃষ্টি কৰে।
মটৰ চালকসকলৰ বাবে কঠোৰ নীতি প্ৰৱৰ্তন কৰাৰ উপৰিও, দিল্লী চৰকাৰে নতুন প্ৰযুক্তি-আধাৰিত ব্যৱস্থা প্ৰৱৰ্তনৰ ওপৰতো কাম কৰি আছে। মানুহে যাতে নিয়মবোৰ গুৰুত্বসহকাৰে পালন কৰে সেয়া নিশ্চিত কৰিবলৈ এইবোৰ প্ৰৱৰ্তন কৰা হ'ব, আৰু চৰকাৰ বা নাগৰিকৰ কাৰো কোনো অসুবিধা নহয়।
Continue Reading
