ডিজিটেল ডেস্কঃ বানে বিধ্বস্ত কৰা অৰুণাচল প্ৰদেশৰ টিপ্পিত সংঘটিত হৈছে ভয়ংকৰ ভূমিস্খলনৰ ঘটনা।ভূমিস্খলনৰ ফলত পাহাৰৰ পৰা খহি পৰা প্ৰকাণ্ড প্ৰকাণ্ড শিল ৰাজপথত বাগৰি পৰাত ফলত টাৱাঙলৈ যোৱা একমাত্ৰ পথটি বন্ধ হৈ পৰিছে।প্ৰায় দুদিন ধৰি বন্ধ হৈ আছিল এই পথটি। কিন্তু দুদিন ধৰি ৯১ আৰচিচি বৰ্ডাৰ ৰোড অৰ্গেনাইজেছনে অশেষ কষ্ট কৰি এস্কেভেটৰৰ সহায়ত শিল সমূহ আঁতৰাই আজি পথটি পুনৰ যাতায়তৰ বাবে মুকলি কৰি দিয়ে।
উল্লেখ্য কেইদিনমান পূৰ্বে ডাৱৰ বিস্ফোৰণে জলপ্ৰলয়ৰ সৃষ্টি কৰিছিল অৰুণাচলত। অৰুণাচলৰ ৰাজধানী ইটানগৰত কোনোদিন নেদেখা অকল্পনীয় দৃশ্যৰ সাক্ষী হৈছিল চহৰখনৰ বাসিন্দাসকল। ডাৱৰ বিস্ফোৰণৰ ফলত সৃষ্টি হোৱা ভয়াৱহ কৃত্ৰিম বানে বিধস্ত কৰি পেলাইছে ইটানগৰৰ জনজীৱন।
পানীয়ে যে এনে কালৰূপ ধাৰণ কৰিব পাৰে বুলি ভাবিবই পৰা নাছিল ইটানগৰবাসীয়ে । আচম্বিতে অহা ভয়াৱহ কৃত্ৰিম বানে এফালৰ পৰা মষিমূৰ কৰি পেলাইছিল ইটানগৰৰ সৌন্দৰ্য । কেইটামান ঘণ্টাৰ বাবে যেন ইটানগৰ পৰিণত হৈছিল সমুদ্ৰলৈ । মূহুৰ্তৰ ভিতৰতে উটুৱাই লৈ গৈছিল ঘৰ , বাহন ইত্যাদি । এতিয়াও ইটানগৰৰ চৌদিশে বিভীষিকাময় পৰিবেশে বিৰাজ কৰিছে । হঠাতে অহা পানীৰ ঢলে খহাই পেলাইছে ৰাজপথ । মূহুৰ্ততে ধ্বংস হল বহুতৰ কষ্টেৰে নিৰ্মিত ব্যৱসায়িক প্ৰতিষ্ঠান । এতিয়া ইটানগৰত মাথো আৰ্তজনৰ উচুপনি । বানে উটুৱাই নিলে বহু পৰিয়ালৰ সন্তানৰ পঢ়াৰ সকলো সামগ্ৰীও ।
Continue Reading
