ডিজিটেল ডেস্কঃ পুনৰ আন্তৰ্জাতিক সন্ত্ৰাসবাদীক ম’ষ্ট ৱাণ্টেড তালিকাত অন্তৰ্ভুক্ত কৰিছে ইণ্টাৰপলে৷খালিস্তানী সন্ত্ৰাসবাদী সংগঠন বাব্বৰ খালছা ইণ্টাৰনেশ্যনেলৰ সদস্য কৰণবীৰ সিঙৰ বিৰুদ্ধে ইণ্টাৰপ’লে ৰেড কৰ্ণাৰ নোটিচ জাৰি কৰিছে। ৩৮ বছৰীয়া কৰণবীৰ সিঙৰ ঘৰ মূলতঃ পঞ্জাৱৰ কাপুৰথালাৰ। সূত্ৰ অনুসৰি তেওঁ পাকিস্তানত উপস্থিত থাকিব পাৰে।
কৰণবীৰ সিং বব্বৰ খালছাৰ সন্ত্ৰাসবাদী ৱাধৱা সিং আৰু হৰবিন্দৰ সিং ৰিন্দাৰ সোঁহাত বুলি কোৱা হয়। ৱাধৱা আৰু ৰিন্দাও পাকিস্তানত আত্মগোপন কৰি থকাৰ সন্দেহ ইণ্টাৰপলে ব্যক্ত কৰিছে।
অভিযোগ উত্থাপন হৈছে যে তেওঁলোকে পাকিস্তানৰ চোৰাংচোৱা সংস্থা আই এছ আইৰ সৈতে ষড়যন্ত্ৰ কৰি ভাৰতত সন্ত্ৰাসবাদী কাৰ্যকলাপ চলাইছে। সূত্ৰ অনুসৰি কৰণবীৰ সিঙৰ বিৰুদ্ধে হত্যা, বিস্ফোৰক আইন, সন্ত্ৰাসবাদী পুঁজি, অস্ত্ৰ আইন আৰু সন্ত্ৰাসবাদী ষড়যন্ত্ৰৰ গোচৰ ৰুজু হৈছে।
ৰেড কৰ্ণাৰ জাননী হৈছে প্ৰত্যাৰ্পণ, আত্মসমৰ্পণ বা অনুৰূপ আইনী প্ৰক্ৰিয়াৰ বাকী থকা অৱস্থাত কোনো ব্যক্তিক বিচাৰি উলিয়াবলৈ আৰু সাময়িকভাৱে আটক কৰিবলৈ ইন্টাৰপলৰ সদস্য ৰাষ্ট্ৰৰ পৰা আইন প্ৰয়োগকাৰী সংস্থাক কৰা এক অনুৰোধ।
Continue Reading
