ডিজিটেল ডেস্কঃ বৰদিনৰ উলাহৰ মাজতে ভয়ানক তুষাৰপাত আৰু ধুমুহাৰ ফলত সমগ্ৰ আমেৰিকা বিধ্বস্ত হৈ পৰিছে। এই প্ৰাকৃতিক দুৰ্যোগত এতিয়ালৈকে ২২ জন লোকৰ মৃত্যু হৈছে। প্ৰায় ১৫ লাখ পৰিয়ালত বিদ্যুৎ সংযোগ নোহোৱা হৈ পৰিছে। কিছুমান ঠাইত তাপমাত্ৰা -৪৫ ডিগ্ৰী চেলচিয়াছৰ তললৈ হ্ৰাস পাইছে। কৰবাত ইমানেই বেছি বৰফ পৰিছে যে ৰাস্তা আৰু ঘৰবোৰ ১০ ফুট বৰফৰ আৱৰণত পোত গৈছে।
প্ৰচণ্ড তুষাৰপাত আৰু ধুমুহাই সমগ্ৰ আমেৰিকা যুক্তৰাষ্ট্ৰত বিমান সেৱা ব্যাহত কৰি তুলিছে।তুশাৰ ধুমুহাৰ বাবেই কালি ৫,৯৩৪ খন বিমান বাতিল কৰা হৈছিল। আজিও ২,৭০০ খন বিমান বাতিল কৰা হৈছে। বতৰ বিজ্ঞান বিভাগৰ মতে আমেৰিকা যুক্তৰাষ্ট্ৰৰ টেক্সাছৰ পৰা কানাডাৰ কুইবেকলৈকে ৩,২০০ কিলোমিটাৰ এলেকাত তুষাৰপাতৰ ফলত বিধ্বংসী পৰিস্থিতিৰ সৃষ্টি হৈছে।বতৰ বিজ্ঞানীসকলে ঘূৰ্ণীবতাহটোৰ নাম 'বম্ব ঘূৰ্ণীবতাহ' ৰাখিছে, কাৰণ ই বোমা বিস্ফোৰণৰ দৰেই মাৰাত্মক।
মিনেসোটা, আইৱা, বাফেলো, উইচকনচিন, মিচিগান আৰু নিউয়ৰ্কত দৃশ্যমানতা শূন্যলৈ হ্ৰাস পাইছে। অণ্টাৰিঅ'ৰ মিচিগানৰ লেক চুপিৰিয়ৰ, হুৰনৰ চাৰিওফালৰ এলেকাবোৰত প্ৰচুৰ তুষাৰপাত হৈছে।
ধুমুহা বতাহৰ বাবে বহু ঠাইত বিদ্যুতৰ খুটা উভালি পৰিছে। গছ-গছনিও উভালি পৰি পথ বন্ধ কৰি পেলাইছে৷ ।
পেনচিলভেনিয়া, ভাৰ্জিনিয়া আৰু নৰ্থ কেৰোলিনা আটাইতকৈ বেছি ক্ষতিগ্ৰস্ত হৈছে। টেনেচি, নিউয়ৰ্ক, মেৰিলেণ্ড আৰু কানেকটিকাটতো পৰিস্থিতি জটিল হৈ পৰিছে।নিউয়ৰ্কত জৰুৰীকালীন অৱস্থা ঘোষণা কৰা হৈছে।
Continue Reading
