'ব্ৰেকফাষ্ট' বৈঠকত মোদীৰ সৈতে ৪০ সাংসদ : সাজু ৰণনীতি !

ডিজিটেল ডেস্ক : সন্মুখত পাঁচ ৰাজ্যৰ বিধানসভা নিৰ্বাচন৷ শাসনাধীষ্ঠ দলৰ লগতে বিৰোধী ৰাজনৈতিক দলেও উঠি পৰি লাগিছে নিৰ্বাচনী ৰণনীতি তৈয়াৰ কৰাত৷ কিছু দিন পূৰ্বে উত্তৰ প্ৰদেশৰ বাৰাণসীত কোটিটকীয়া কাশী-বিশ্বনাথ প্ৰকল্পৰ প্ৰথমটো পৰ্যায়ৰ শুভাৰম্ভ কৰিছিল শাসনাধীষ্ঠ দলটোৱে৷ এই অনুষ্ঠানত উপস্থিত আছিল প্ৰধানমন্ত্ৰী নৰেন্দ্ৰ মোদীসহ বিজেপিৰ ৰাষ্ট্ৰীয় সভাপতি, বিজেপিশাসিত ৰাজ্যৰ মুখ্যমন্ত্ৰীসকলো৷ এই প্ৰক্ৰিয়া অব্যাহত ৰাখিছে প্ৰধানমন্ত্ৰী মোদীয়ে। যোগী চৰকাৰ পুনৰ প্ৰতিষ্ঠাৰ চেষ্টাত আজি প্ৰধানমন্ত্ৰী মোদীয়ে ৰাজ্যখনৰ ৪০গৰাকী বিজেপিৰ সাংসদৰ সৈতে মিলিত হয় 'ব্ৰেকফাষ্ট' বৈঠকত৷

২০২২ বৰ্ষৰ ফেব্ৰুৱাৰী মাহত অনুষ্ঠিত হ'ব লগা ৰাজ্যখনৰ বিধানসভা নিৰ্বাচনত ভোটাৰক আকৰ্ষণৰ বাবে চেষ্টা চলাইছে বিজেপি দলে৷ হিন্দু সংখ্যাগৰিষ্ঠ ৰাজ্যখনত মন্দিৰ নিৰ্মাণতো অধিক গুৰুত্ব দিয়া পৰিলক্ষিত হৈছে৷ দুদিনীয়া ভ্ৰমণসূচী লৈ প্ৰধানমন্ত্ৰীয়ে ৰাজ্যখনৰ কেইবাটাও কাৰ্যসূচীত অংশ লৈছিল৷ প্ৰধানমন্ত্ৰীক সহযোগিতা আগবঢ়োৱাৰ উদ্দেশ্যেৰে বিজেপিৰ ৰাষ্ট্ৰীয় সভাপতি তথা বিজেপিৰ ১২গৰাকী মুখ্যমন্ত্ৰীয়েও ৰাজ্যখনত কেইবালানি আলোচনাতো মিলিত হৈছিল৷ বিজেপিয়ে আগন্তুক নিৰ্বাচন কেন্দ্ৰ কৰিয়ে ৰাজ্যখনত ৬ যাত্ৰাৰ কাৰ্যসূচী গ্ৰহণ কৰিছে৷ এই ৬ যাত্ৰাৰ কাৰ্যসূচীত ৪০৩টা বিধানসভা সমষ্টিক সাঙুৰি লোৱা হৈছে বুলি জানিব পৰা গৈছে৷

লোকসভা নিৰ্বাচনৰ সময়ছোৱাত প্ৰধানমন্ত্ৰীয়ে নিতৌ ব্ৰেকফাষ্ট বৈঠকত মিলিত হৈছিল দলীয় সাংসদৰ সৈতে৷ ইয়াৰ পূৰ্বে প্ৰধানমন্ত্ৰী মোদীয়ে মধ্য প্ৰদেশৰ বিজেপি সাংসদৰ সৈতে মিলিত হৈছিল বৈঠকত৷ উল্লেখ্য যে আগন্তুক নিৰ্বাচনৰ পূৰ্বে উত্তৰ প্ৰদেশত বিজেপিয়ে নিষাদ পাৰ্টী আৰু আপনা দল (এছ)-ৰ সৈতে মিত্ৰতা স্থাপন কৰে৷ লগতে লক্ষ্ণৌত আজি নিষাদ পাৰ্টীৰ সহযোগিতাত বিজেপিয়ে এক ৰেলী মুকলি কৰিব৷ এই ৰেলীত অংশ ল'ব গৃহমন্ত্ৰী অমিত শ্বাহ আৰু মুখ্যমন্ত্ৰী যোগী আদিত্যনাথেও৷