ডিজিটেল ডেস্কঃ এক শক্তিশালী বোমা বিস্ফোৰণে জোকাৰি গ’ল পাকিস্তানৰ বেলুচিস্তানক৷ এলেকাটোত পাকিস্তান বিৰোধী বিদ্ৰোহৰ জুইত জ্বলি থকাৰ সময়তে এই বিস্ফোৰণে বিভিন্ন দিশৰ উন্মেষ ঘটাইছে। পাকিস্তানী সেনাই বেলুচ স্বাধীনতা সংগ্ৰামীসকলৰ সৈতে নিৰন্তৰ যুঁজ দি আছে। পাক সেনাই বিদ্ৰোহ দমন কৰিবলৈ নিৰ্বিচাৰ হত্যাকাণ্ড চলাই যোৱাৰো অভিযোগ উঠিছে।
এনে পৰিস্থিতিত ভাৰতৰ চুবুৰীয়া দেশখনৰ আটাইতকৈ বিশাল প্ৰদেশখনত হোৱা বিস্ফোৰণে বহুতকে ভবাই তুলিছে৷বোমা বিস্ফোৰণটোত কমেও ৩৫ জন লোক নিহত হোৱাৰ খবৰ আহিছে। মৃতসকলৰ ভিতৰত এজন জ্যেষ্ঠ আৰক্ষী বিষয়াও আছে।শুকুৰবাৰে বেলুচিস্তান প্ৰদেশৰ মাষ্টুং অঞ্চলৰ এটা মছজিদৰ ওচৰত এই বিস্ফোৰণ সংঘটিত হয়। পয়গম্বৰ মহম্মদৰ জয়ন্তী উপলক্ষে মছজিদত এক সমাৱেশৰ আয়োজন কৰা হৈছিল।
ভিৰৰ মাজতে বিস্ফোৰণটো সংঘটিত হয়৷ বিস্ফোৰণৰ প্ৰভাৱ ইমানেই শক্তিশালী আছিল যে বহু কেইখন গাড়ী দূৰৈত চিটিকি পৰিছিল। আক্ৰমণটোত কমেও ৩৫ জন লোক নিহত হৈছে বুলি আৰক্ষীয়ে প্ৰকাশ কৰিছে। মৃতসকলৰ ভিতৰত আৰক্ষীৰ এজন ডিএছপিও আছে৷ মাষ্টুঙৰ সহকাৰী আয়ুক্ত আত্তা উল মুনিমৰ মতে, বিস্ফোৰণটোত বহু লোক আহত হৈছে৷ এতিয়ালৈকে কোনেও আক্ৰমণৰ দায়িত্ব স্বীকাৰ কৰা নাই। অৱশ্যে বহুতে ধাৰণা কৰিছে যে তেহৰিক-ই-তালিবান পাকিস্তান বা বেলুচ লিবাৰেচন ফ্ৰণ্ট ইয়াৰ আঁৰত জড়িত থাকিব পাৰে।
বেলুচিস্তানে দীৰ্ঘদিন ধৰি পাকিস্তানৰ শাসনৰ পৰা মুক্ত হ’বলৈ যুঁজ দি আহিছে। ইছলামাবাদে হত্যা, ধৰ্ষণৰ দৰে অমানৱীয় পন্থা গ্ৰহণ কৰি বিদ্ৰোহৰ জুই নুমুৱাবলৈ চেষ্টা কৰি আছে। বিশেষকৈ চীন-পাকিস্তান অৰ্থনৈতিক কৰিডৰ নিৰ্মাণ হোৱাৰ পাছৰে পৰা বেলুচিস্তান অধিক অস্থিৰ হৈ পৰিছে। অভিযোগ কৰা হৈছে যে পাকিস্তানী কৰ্তৃপক্ষই খনিজ সমৃদ্ধ প্ৰদেশখনত লুণ্ঠন চলাই আহিছে। ইয়াৰ বিনিময়ত, বেলুচ লোকসকলে কেৱল অত্যাচাৰ আৰু দৰিদ্ৰতাৰহে বলি হৈছে৷
Continue Reading
