ডিজিটেল ডেস্কঃ বুধবাৰে বাংলাদেশ ক্ৰিকেটত এক লাজৰ ইতিহাস ৰচিত হয়। দলটোৰ অভিজ্ঞ তাৰকা মুছফিকুৰ ৰহিমে বেটিং কৰি থাকোতে হাতেৰে বল ৰখাই আউট হ’ল। ইয়াক ‘Obstructing the Field’ বুলি কোৱা হয়। এনেদৰে ওলাই অহা প্ৰথমজন ক্ৰিকেটাৰ হিচাপে পৰগণিত হ’ল মুছফিকুৰ। বুধবাৰে নিউজিলেণ্ডৰ বিৰুদ্ধে দ্বিতীয়খন টেষ্টৰ প্ৰথম দিনাই সংঘটিত হয় এই ঘটনা।
খেলখনৰ ৪১ নং অভাৰত সংঘটিত হয় এই ঘটনা। কাইল জেমিছনৰ পৰা এটা চুটি লেংথ বল ক্ৰীজত থিয় হৈ মুছফিকুৰে খেলে। কিন্তু বলটো খেলপথাৰত তললৈ নামি বাউন্স কৰে। ষ্টাম্পলৈ যাব বুলি মুছফিকুৰে হঠাতে হাতেৰে বলটো আঁতৰাই ঠেলি দিয়ে। সেই বলটোৱে উইকেটত খুন্দা মৰাৰ সম্ভাৱনা প্ৰায় নাছিল। কিন্তু যিহেতু মুছফিকুৰে ইচ্ছাকৃতভাৱে বলটো ‘মৃত’ হোৱাৰ আগতেই হাতেৰে আঁতৰাই পেলাইছিল, সেয়েহে নিউজিলেণ্ডৰ ক্ৰিকেটাৰসকলে ‘অবষ্ট্ৰাকটিং দ্যা ফিল্ড’ আউটৰ বাবে আবেদন কৰিছিল।
খেলপথাৰত থকা আম্পায়াৰসকলে কোনো সিদ্ধান্ত ল’ব পৰা নাছিল। তেওঁলোকে এই সিদ্ধান্ত তৃতীয় আম্পায়াৰলৈ প্ৰেৰণ কৰে। তৃতীয় আম্পায়াৰ আহছান ৰাজাই মুছফিকুৰক আউট দিয়াৰ সিদ্ধান্ত লয়।
উল্লেখ্য যে এই আউটৰ পূৰ্বেও মুছফিকুৰে একে ধৰণেৰে হাতেৰে বলটো আঁতৰাবলৈ চেষ্টা কৰিছিল। সেইবাৰ তেওঁৰ হাতত বলটো নাছিল। অৰ্থাৎ হাত আৰু বলৰ কোনো সম্পৰ্ক নাছিল। গতিকে কিউই ক্ৰিকেটাৰসকলেও আবেদন কৰা নাছিল। মুছফিকুৰে ৮৩টা বলত ৩৫ ৰান কৰি আউট হয়।
ক্ৰিকেটৰ নিয়ম অনুসৰি ইয়াক পূৰ্বতে ‘হেণ্ডলিং দ্যা বল’ বুলি জনা গৈছিল। কিন্তু ২০১৭ চনত ক্ৰিকেট আইনত এই আউটৰ নাম সলনি কৰা হয়। আইনখনৰ ৩৭ নং ধাৰা অনুসৰি এই আউট ‘ফিল্ডত বাধা দিয়া’ বুলি কোৱা হ’ল। ৩৭.১.২ আইন অনুসৰি যদি বেটছমেনে বল ডেলিভাৰী দিয়াৰ পিছত বেট ধৰি নথকা হাতখনেৰে বলটো ব্লক কৰিবলৈ চেষ্টা কৰে, বা বেটৰ প্ৰথম বা দ্বিতীয় ষ্ট্ৰ’কৰ পিছত হাতখনেৰে বলটো লৰচৰ কৰে, তেন্তে আউট হয়।
Continue Reading
