ডিজিটেল ডেস্কঃ ক্ৰিকেটাৰ বিৰাট কোহলী দেশ তথা বিদেশৰো বহুতৰে বাবে নয়নৰ মণি। শেহতীয়াকৈ ছ’চিয়েল মিডিয়াত ভাইৰেল হৈছে এখন ছবি। ছবি খনত সাইলাখ বিৰাট কোহলীৰ দৰেই এজন লোকক দেখা গৈছে। বিৰাট কোহলীৰ সৈতে চেহেৰাৰ হুবহু মিল থকা এই লোক জন হাৰিয়ানাৰ এজন ছফ্টৱেৰ অভিযন্তা কাৰ্তিক শৰ্মা ।
কাৰ্তিক শৰ্মাৰ ছবি এতিয়া ইণ্টাৰনেটত ভাইৰেল হৈ পৰিছে। ভাৰতীয় ক্ৰিকেট দলৰ প্ৰাক্তন অধিনায়ক বিৰাট কোহলীৰ সৈতে তেওঁৰ চেহেৰাৰ থকা অস্বাভাৱিক সাদৃশ্যই নেটিজেনসকলক আচৰিত আৰু কৌতূহলী কৰি তুলিছে।
ক্ৰিকেটৰ কিংবদন্তী কোহলীৰ সৈতে কাৰ্তিকৰ অদ্ভুত সাদৃশ্যই কেৱল তেওঁৰ প্ৰতি মানুহৰ মনোযোগ আকৰ্ষণ কৰাই নহয়, তেওঁক এজন সামাজিক মাধ্যমৰ চেলিব্ৰিটিৰ পৰ্যায়লৈ লৈ গৈছে।
তেওঁৰ নতুন খ্যাতি স্বত্বেও, কাৰ্তিক নিজৰ ঠাইতে অবিচল হৈ আছে। তেওঁ স্পষ্ট কৰি দিছে যে তেওঁ বিৰাট কোহলী নহয় , এজন ছফ্টৱেৰ অভিযন্তা। তেওঁৰ কোহলীৰ সৈতে চেহেৰাতহে মিল আছে। তেওঁ প্ৰায়ে তেওঁৰ সৈতে ফটো তুলিব বিচৰা লোকসকলৰ আঁতৰি ফুৰিব বিচাৰে। অৱশ্যে কোনোবাই খুব জোৰ কৰিলে ফটো নুঠাকৈও নাথাকে।
ক্ৰিকেটত কেৰিয়াৰ গঢ়িব নোৱাৰিলেও কাৰ্তিকৰ খেলৰ প্ৰতি আগ্ৰহ আছে। বিশেষকৈ বিৰাট কোহলীয়ে তেওঁৰ হৃদয়ত তেওঁৰ আদৰ্শ খেলুৱৈ হিচাপে এক বিশেষ স্থান দখল কৰিছে। কাৰ্তিকে কোহলীক ব্যক্তিগতভাৱে লগ কৰিবলৈ ইচ্ছা থকাৰ কথাও ব্যক্ত কৰে।
ইণ্টাৰনেটত ভাইৰেল হৈ পৰা কাৰ্তিকৰ ভিডিঅ’বোৰে বহুতৰে মনত কৌতূহল জগাই তুলিছে। । বহুতেই কোহলী আৰু কাৰ্তিকৰ মাজত পাৰ্থক্য বিচাৰি উলিয়াব পৰা নাই। কাৰ্তিকৰ চেহেৰাই আকৰ্ষিত কৰি আহিছে বহুতকে। কাৰ্তিকে আকৌ এবাৰ প্ৰমাণ কৰিছে যে চেলিব্ৰিটিৰ চেহেৰাৰ সৈতে আন বহুতৰে চেহেৰাৰ মিল থাকিব পাৰে।
Continue Reading
