ডিজিটেল ডেস্কঃ কিং কোহলীৰ প্ৰশংসাত পঞ্চমুখ ভূতপূৰ্ব ভাৰতীয় ক্ৰিকেটাৰ গৌতম গম্ভীৰ৷ চলি থকা এদিনীয়া বিশ্বকাপত যোৱা নিশা (৮ অক্টোবৰ) ভাৰত-অষ্ট্ৰেলিয়াৰ খেলখনত বিৰাট কোহলীৰ ইনিংছক প্ৰশংসা কৰিছে প্ৰাক্তন ক্ৰিকেটাৰ গৌতম গম্ভীৰে। তেওঁৰ ফিটনেছ আৰু উইকেটৰ মাজত দৌৰাৰ পৰা আৰম্ভ কৰি চাপযুক্ত মেচত ভাল খেলালৈকে বিৰাট কোহলীৰ বহু গুণ গণিছে। ভাৰতৰ যুৱ ক্ৰিকেটাৰসকলকো এই সকলোবোৰ বিৰাট কোহলীৰ পৰা শিকিবলৈ পৰামৰ্শ দিছে।
উল্লেখযোগ্য যে আই পি এলৰ সময়ত গৌতম গম্ভীৰ আৰু বিৰাট কোহলীৰ মাজত বহু সময়ত মতানৈক্য দেখা গৈছে। খেলপথাৰৰ বাহিৰতো গৌতম গম্ভীৰে বহুবাৰ বিৰাট কোহলীক টাৰ্গেট কৰি আহিছে। কিন্তু এইবাৰ তেওঁ কোহলীৰ প্ৰশংসাত পঞ্চমুখ হৈ পৰিছে। তেওঁ কয়, ‘মই ভাবো খেলখন সঠিকভাৱে পঢ়াৰ বিষয় আৰু ই অতি জৰুৰী। যেতিয়া আপুনি এটা ডাঙৰ স্ক’ৰ অনুসৰণ কৰে, তেতিয়া আপুনি চাপ কেনেকৈ চম্ভালিব লাগে সেই বিষয়ে জানিব লাগে। যিকোনো পৰিস্থিতিত নিজৰ লক্ষ্যত উপনীত হোৱাৰ আত্মবিশ্বাস থাকিব লাগে।’
গম্ভীয়ে কয়, ‘আটাইতকৈ গুৰুত্বপূৰ্ণ কথাটো হ’ল যে এদিনীয়া ক্ৰিকেটত যেতিয়া বিৰাটে এই কাম কৰে, তেতিয়া আপুনি দেখিব পাৰে যে কেৱল ডাঙৰ ডাঙৰ শ্বট মাৰিলেই নহয়। ইয়াত উইকেটৰ মাজত দৌৰাটোৱেই গুৰুত্বপূৰ্ণ।
গম্ভীৰে লগতে কয় যে যদি আপুনি দুই ৰাণৰ স্ক’ৰত দুটা-তিনিটা উইকেট হেৰুৱাইছে, তেন্তে খেলপথাৰত উঠাৰ লগে লগে ডাঙৰ শ্বট খেলিব নোৱাৰিব। হেঁচাত খেলিব জানিব লাগে আৰু ষ্ট্ৰাইক অবিৰতভাৱে সলনি কৰি থাকিবলৈ চেষ্টা কৰিব লাগে। আশা কৰো নতুন ক্ৰিকেটাৰে এই সকলোবোৰ বিৰাট কোহলীৰ পৰা শিকিব।
Continue Reading
