ডিজিটেল ডেস্কঃ এতিয়া বলীউডত মাথোঁ ৰণবীৰ কাপুৰ আৰু আলিয়া ভাটৰ বিয়াৰ গুণগুণনি। জানিব পৰা মতে ১৭ এপ্ৰিলত হোমৰ জুইক সাক্ষী কৰি চিৰজীৱনলৈ এক হ'ব ৰণবীৰ-আলিয়া। মৰমতে অনুৰাগীসকলে এই প্ৰেমিকযুগলক নাম দিছে 'ৰণালিয়া'। এই মুহূৰ্তত প্ৰশ্ন উঠিছে যে আলিয়াই বিবাহৰ পিছত তেওঁৰ উপাধি সলনি কৰিব নে নাই?
বিবাহৰ পাছত প্ৰতিজনী ছোৱালীৰ জীৱনত বহুতো পৰিৱৰ্তন আহি পৰে, সেয়া লাগিলে বলীউডৰ এগৰাকী জনপ্ৰিয় অভিনেত্ৰীয়েই নহওক কিয়। ৰণবীৰক বিয়া কৰাই আলিয়াৰ জীৱনো সলনি হ'ব বুলি ভাবিছে অনুৰাগীসকলে। সকলোৱে এতিয়া ভাবি আছে যে বিবাহৰ পাছত আলিয়াই তেওঁৰ উপাধি 'ভাট'ৰ পৰা 'কাপুৰ'লৈ সলনি কৰিব নে আলিয়াই তেওঁৰ পিতৃপদত্ত উপাধি লৈয়ে জীৱন বাটত আগবাঢ়িব? এক খবৰ বিয়পি পৰিছে যে ৰণবীৰক বিয়া কৰাৰ পাছত আলিয়াই কাপুৰ উপাধি লিখিব কিয়নো তেওঁৰ শাহু নীতু কাপুৰেও তেনে কৰিছিল।
ঋষি কাপুৰক বিয়া কৰাই নীতু সিঙে তেওঁৰ নাম সলনি কৰি নীতু সিং কাপুৰ কৰিছে। শাহুৱেকৰ পথ অনুসৰণ কৰি আলিয়া ভাটেও নিজৰ নামৰ লগত কাপুৰ উপাধি সংযোজন কৰিবলৈ সাজু হৈছে। কিন্তু ৰণবীৰে বিচাৰে যে আলিয়াই নামটো যেনেকৈ আছে তেনেকৈয়ে ৰাখক।
উল্লেখ্য যে বিবাহৰ পাছত বহু অভিনেত্ৰীয়ে নিজ স্বামীৰ উপাধি নামৰ লগত সংযোজন কৰিছে যেনে-ঐশ্বৰ্য ৰায় বচ্চন, কৰীণা কাপুৰ খান, প্ৰিয়ংকা চোপ্ৰা জোনাছ, সোনম কাপুৰ আহুজা, শিল্পা চেট্টী কুন্দ্ৰা আদি। গতিকে যদি আলিয়াইও এনে কৰে তেন্তে অনুৰাগীসকলৰ বাবে এইটো একেবাৰে আচৰিত হ'বলগীয়া খবৰ নহয়। নাম সলনি কৰক বা নকৰক আলিয়া যাতে সলনি নহয় তাকে আশা ৰাখিছে অনুৰাগীসকলে।
Continue Reading
