বিচিচিআইৰ গুৰুত্বপূৰ্ণ পদক্ষেপঃ পুৰুষ ক্ৰিকেটাৰৰ সমানেই মহিলা ক্ৰিকেটাৰেও লাভ কৰিব ক্ৰিকেট মেচৰ মাননি

ডিজিটেল ডেস্কঃ পুৰুষ ক্ৰিকেটাৰসকলৰ সমানেই মাননি লাভ কৰিব মহিলা ক্ৰিকেটাৰসকলেও। বিচিচিআইয়ে শেহতীয়াকৈ এই সিদ্ধান্ত লৈছে।

বৃহস্পতিবাৰে বিচিচিআইৰ সচিব জয় শ্বাহে ঘোষণা কৰে যে ব’ৰ্ডৰ স’তে বন্দোৱস্ত থকা পুৰুষ আৰু মহিলা খেলুৱৈ, উভয়ে সমান পৰিমাণে একোখন মেচৰ মাননি লাভ কৰিব।

পুৰুষৰ সমানেই মহিলাসকলকো এই পদক্ষেপৰ দ্বাৰা ক্ৰিকেটৰ পথাৰত গুৰুত্ব প্ৰদান কৰা হৈছে। বিচিচিআইয়ে এটা টুইটযোগে কয় যে লিংগ বৈষম্য দূৰ কৰিবলৈ এই পদক্ষেপ লোৱা হৈছে। তদুপৰি ২০২৩ চনত মহিলা আইপিএলো অনুষ্ঠিত কৰাৰ সিদ্ধান্ত লোৱা হৈছে।

উল্লেখ্য যে বিচিচিআইয়ে টীম ইণ্ডিয়াৰ খেলুৱৈসকলক প্ৰতিখন টেষ্টৰ বাবদ ১৫ লাখ, এদিনীয়াৰ বাবদ ৬ লাখ আৰু আন্তৰ্জাতিক টি২০ৰ বাবদ ৩ লাখ টকাকৈ মাননি প্ৰদান কৰি আহিছে।

অৱশ্যে উভয় লিংগৰ ক্ৰিকেটাৰক এনেদৰে সমান মাননি প্ৰদান কৰাত কেৱল ভাৰতেই নহয়, নিউজিলেণ্ডে একেই পদক্ষেপ হাতত লৈছে। চলিত বৰ্ষৰ প্ৰথমফালে নিউজিলেণ্ড ক্ৰিকেট ব’ৰ্ডে এই ঘোষণা কৰিছিল।