ডিজিটেল ডেস্ক : মুম্বাইত বিধ্বংসী অগ্নিকাণ্ডই প্ৰাণ কাঢ়িলে সাতজনকৈ লোকৰ। শনিবাৰে পুৱাৰ ভাগত ২০মহলীয়া এটা আবাসিক অট্টালিকাত এই অগ্নিকাণ্ডৰ সূত্ৰপাত হয়। এই ঘটনাত আন ২৩জন লোক আঘাতপ্ৰাপ্ত হোৱা বুলি প্ৰকাশ পাইছে।
মুম্বাইৰ টাৰ্ডেঅ’ এলেকাৰ গান্ধী হাস্পতালৰ সমীপৰ কমলা বিল্ডিং নামৰ সুউচ্চ ভৱনটোৰ ১৮নং মহলাত পুৱাৰ ভাগত জুইৰ সূত্ৰপাত ঘটে। পুৱা প্ৰায় ৭বজাত এই জুই লাগে অট্টালিকাটোত। জুয়ে আগুৰি ধৰা মহলাটোৰ বিভিন্ন আলোকচিত্ৰ আৰু ভিডিঅ’ সংবাদ মাধ্যমত ব্যাপকভাৱে প্ৰচাৰ হৈছে। জুই আৰু ধোঁৱাৰ কুণ্ডলীৰ অতি ভয়ংকৰ ৰূপে প্ৰত্যক্ষদৰ্শীক আতংকিত কৰি তোলে। বিভাগীয় সূত্ৰই প্ৰকাশ কৰা মতে অট্টালিকাটোত লগা জুই এতিয়া নিয়ন্ত্ৰণ কৰা হৈছে। ইফালে, এই ঘটনাক লৈ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে।
অগ্নিকাণ্ডত নিহত লোকসকলৰ পৰিয়ালক ২লাখ টকাকৈ ক্ষতিপূৰণ দিয়াৰ লগতে আহতসকললৈ ৫০হাজাৰকৈ টকাৰ ক্ষতিপূৰণ দিয়াৰ কথা ঘোষণা কৰিছে প্ৰধানমন্ত্ৰীৰ কাৰ্যালয়ে। মহাৰাষ্ট্ৰৰ উপ মু্খ্যমন্ত্ৰী অজিত পাৱাৰে এই সন্দৰ্ভত প্ৰতিক্ৰিয়া ব্যক্ত কৰি কয় যে, এই ঘটনাৰ তদন্ত কৰা হ’ব আৰু মুম্বাই ছাব আর্বানৰ অভিভাৱক মন্ত্ৰী আদিত্য থাকৰে তথা মুম্বাই মহানগৰৰ অভিভাৱক মন্ত্ৰী আছলাম শ্বেইখে এই বিষয়টো পৰ্যালোচনা কৰিব। ইফালে, আদিত্য থাকৰেই ইতিমধ্যে ঘটনাস্থল পৰিদৰ্শন কৰিছে আৰু এই অগ্নিকাণ্ডত নিহতসকলৰ পৰিয়াললৈ ৫লাখকৈ টকাৰ ক্ষতিপূৰণ দিয়াৰ কথা ঘোষণা কৰিছে।
