বিএমডব্লিউ, বিলাসী মেকুৰী জব্দ; ধনকুবেৰ সুকেশৰ পৰা আৰু কি‌ উপহাৰ লৈছিল জেকলিন-নোৰাই ?

নতুন দিল্লীঃ বলীউড এৰিনাত এতিয়া জেকলিন ফাৰ্ণাণ্ডেজ আৰু নোৰা ফাতেহীৰ প্ৰসংগই চৰ্চাৰ কেন্দ্ৰবিন্দু হৈ পৰিছে। শেহতীয়াকৈ, প্ৰতাৰণাৰ অভিযোগত অভিযুক্ত ব্যৱসায়ী সুকেশ চন্দ্ৰশেখৰৰ পৰা দুই বলীউড নায়িকাই গ্ৰহণ কৰা বিলাসী উপহাৰসমূহ জব্দ কৰিছে প্ৰৱৰ্তন সঞ্চালকালয়ে। প্ৰৱৰ্তন বিভাগে বিতৰ্কিত ব্যৱসায়ী সুকেশ চন্দ্ৰশেখৰৰ পৰা জেকলিন ফাৰ্ণাণ্ডেজ আৰু নোৰা ফাতেহীয়ে লোৱা বিলাসী গাড়ী, অলংকাৰ আৰু ব্যয়বহুল সামগ্ৰীসমূহ জব্দ কৰা বুলি সংবাদ মাধ্যমত প্ৰকাশ পাইছে।

উল্লেখ্য যে,২০০ কোটি টকাৰ মানি লণ্ডাৰিঙৰ গোচৰত অভিনেত্ৰী দুজনৰ নাম সাঙোৰ খাইছিল। তেতিয়াৰে পৰাই বিষয়টো চৰ্চাত আছে। বাৰে বাৰে আৰক্ষীৰ জেৰাৰ সন্মুখীন হ’বলগীয়া হৈছে দুই নায়িকা। সুকেশ চন্দ্ৰশেখৰক জেকলিনৰ প্ৰেমিক বুলিও কোৱা হৈছিল। তেওঁলোকৰ বিৰুদ্ধে অভিযোগ পত্ৰ দাখিল কৰা বাবে তদন্ত প্ৰক্ৰিয়াও হৈছে পলম। এই গোচৰটোত এতিয়ালৈকে ৭জনৰো অধিক লোকক গ্ৰেপ্তাৰ কৰা হৈছে। বৰ্তমান এই গোচৰত অভিযুক্ত ৭জন লোকক তিহাৰ কাৰাগাৰতে ৰখা হৈছে। সুকেশ আৰু তেওঁৰ পত্নী লীনা পলে এটা ফাৰ্মাচিউটিকেল কোম্পানীৰ প্ৰাক্তন সঞ্চালক শিবেন্দ্ৰ সিং আৰু মালবেন্দ্ৰ সিঙৰ পৰিয়ালক ২০০ কোটি টকাৰ প্ৰতাৰণা কৰা বুলি সংবাদ মাধ্যমত প্ৰকাশ পাইছিল। অভিযুক্ত দম্পতীকো এই গোচৰৰ আওতাত কৰা হৈছে গ্ৰেপ্তাৰ।