বিহাৰৰ ৰাজনীতিত নক্ষত্ৰ পতনঃ সুশীল মোদীৰ মৃত্যু, বিভিন্নজনৰ শোক প্ৰকাশ

সুশীল মোদীয়ে তেওঁৰ দীঘলীয়া ৰাজনৈতিক কেৰিয়াৰত দুবাৰকৈ বিহাৰৰ উপ মুখ্যমন্ত্ৰী হিচাপে কাৰ্যনিৰ্বাহ কৰিছিল। তেওঁ বিজেপি-জেডি(ইউ) চৰকাৰৰ অন্যতম নেতা আছিল। তেওঁ বিজেপি আৰু নীতিশ কুমাৰৰ দলৰ মাজৰ সম্পৰ্কৰ গঢ়ি তোলাত এটা সময়ত মুখ্য ভূমিকা গ্ৰহণ কৰিছিল।  তেওঁক শেহতীয়াকৈ বিজেপিয়ে ৰাজ্যসভাৰ সাংসদ হিচাবে নিৰ্বাচিত কৰি পঠিয়াইছিল ।  সুশীল মোদীয়ে তেওঁৰ স্বাস্থ্যৰ বাবে লোকসভা নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত লৈছিল। সুশীল মোদীয়ে পূৰ্বে কৈছিল "মই যোৱা ৬ মাহ ধৰি কৰ্কট ৰোগৰ সৈতে যুঁজি আছো। মানুহক সকলো কথা কোৱাৰ সময় হৈছে। মই লোকসভা নিৰ্বাচনত একো কৰিব নোৱাৰো। মই প্ৰধানমন্ত্ৰীক সকলো কথা কৈছো। তথাপিও, মই মোৰ জীৱন দেশ, বিহাৰ আৰু দললৈ উৎসৰ্গিত কৰিছো।’’ সুশীল মোদীয়ে  যোৱা এমাহ ধৰি দিল্লীৰ এইমছৰ আইচিইউত চিকিৎসাধীন হৈ আছিল।

বিশ্ববিদ্যালয়ত অধ্যয়ন কৰাৰ সময়ৰে  পৰাই তেওঁ ৰাজনৈতিক কেৰিয়াৰ আৰম্ভ কৰিছিল। ১৯৭৩ চনত  সুশীল মোদী পাটনা বিশ্ববিদ্যালয় ছাত্ৰ সন্থাৰ সভাপতি হৈছিল। তেওঁ ১৯৯০ ৰ পৰা ২০০৪ চনৰ ভিতৰত তিনিবাৰ বিধায়ক আছিল। তেওঁ বিহাৰৰ বিৰোধী দলপতি হিচাবেও কাৰ্যনিৰ্বাহ কৰিছিল। তেওঁ ২০০৩ চনৰ পৰা ২০০৫ চনলৈ বিজেপিৰ ৰাষ্ট্ৰীয় উপ-সভাপতিও আছিল। ৰাজনৈতিক মহলে বিহাৰৰ ৰাজনীতিৰ এজন দক্ষ নেতাৰ আকস্মিক মৃত্যুত শোক প্ৰকাশ কৰিছে। আৰজেডিৰ মুৰব্বী লালু প্ৰসাদ যাদৱ, হিন্দুস্তান আৱামী মৰ্চাৰ মুৰব্বী তথা বিহাৰৰ প্ৰাক্তন মুখ্যমন্ত্ৰী জিতন ৰাম মাঝি, উপ মুখ্যমন্ত্ৰী বিজয় কুমাৰ সিনহা আৰু বহু ৰাজনৈতিক নেতাই সুশীল মোদীৰ মৃত্যুত এক্স-হেণ্ডেলত শোক প্ৰকাশ কৰিছে।